PRAIM Minista James Marape i tok strong long ol wisil blowa mas ripotim ol keis bilong korapsen insait long ol gavman dipatmen na ejensi.

Em i bin mekim dispela tok long palamen las wik taim em i bekim askim bilong memba bilong Ungai-Bena, Benny Allan. Mista Allan i bin mekim askim bihainim ol sut tok bilong korapsen insait long Leba na Indastriel Rilesen Dipatmen. Dispela ol sut tok i bin kam aut bihain long wanpela ripot bilong intenel odit dipatmen i bin mekim

we wanpela wisil blowa i bin tokaut long en na tok, korapsen insait long dispela dipatmen em i sistematik na i bikpela tru. Long makim minista bilong Leba na Indastriel Rilesen, Tomait Kapili, Praim Minista Marape i tok em i welkamim kain ol askim olsem dispela memba bilong Ungai-Bena i putim. Marape i tokim Allan long putim askim bilong em long pepa na givim long Minista Kapili na em yet na givim kopi bilong odit ripot tu wantaim bai ol i ken mekim investigesen.

Em i tok moa olsem ol bai i lukluk long dispela hevi we memba bilong Ungai-Bena i putim aut. “Taim korapsen i kamap insait long gavman sistem, em i samting mipela i mas adresim. Na long dispela taim mi tok amamas long wisil blowa husat i bringim aut dispela hevi. “Mi tok tu long dispela wisil blowa olsem Wisil Blowa Ekt i banisim yu. Mi laikim ol kain wisil i mas krai long mipela i ken paitim ol hevi bilong korapsen. “Korapsen, bikpela o liklik, em i

korapsen. Mi tok tenkyu long wisil blowa long dispela ripot we i stap nau long han bilong polis, tasol ol i no adresim olsem na Mista Allan i bringim long palamen. “Polis i mas adresim ol hevi bilong korapsen taim ol i kisim ripot na no ken larim tasol i stap,” Marape i tok. Em i tok moa olsem gavman bilong em i pasim pinis Wisil Blowa Ekt na tu sanapim Independent Commission Against Corruption (ICAC) long adresim korapsen.