DIPATMEN bilong Jastis Na Atoni Jeneral i wok bung wantaim Consultative Implementation and Monitoring Council (CIMC) na givim wanpela trening long tupela de long ol ripota.

Ol i givim dispela trening long helpim ol ripota long ripotim ol kain samting olsem jenda bes vailens na kot bilong ol liklik pikinini. Dispela i kamap long Ela Beach Hotel long namba wan de na Gateway hotel long namba tu de. Presiden bilong Midia Kaunsil bilong Papua New Guinea Neville Choi, Eksketiv Dairekta bilong Juvenail Sevis Collin Sakap, ol wokmanmeri bilong CIMC , na olgeta wanwan ripota bilong olgeta media long kantri i bin go long dispela trening.

Mista Sakap i tok, “Mipela kam bung nau long save  moa long wanem ol hap mipela inap long mekim wok bilong yumi long helpim wanpela na narapela.  Ol ripota i bin i gat ol wankain trening bilong helpim ol long ripotim ol toktok bilong GBV na Famili vailens. Long sait bilong Juvenail jastis(jastis bilong ol pikinini) em i narapela samting olgeta we ol ripota i bai lainim long ripotim ol pasin nogut ol pikinini i save mekim o stap insait long en. Pawa bilong infomesen em i bikpela tru long ol pipel. Ol manmeri long komyuniti i save bilipim wanem samting i kam aut long midia. Yumi yet i mas save long wanme samting yumi tokim ol narapela Mista Sakap i tok.

Samantha Solomon i raitim