TOKTOK bilong brukim KairukuHiri i kamap tupela elektoret i bin kamap pinis na ol i kamapim gen dispela tingting long wanpela bung bilong ol.

Gavana bilong Sentral provins Robert Agarobe i tok olsem i gat foapela (4) hap bikpela tingting we i mekim Kairuku-Hiri i bruk em long gro bilong populesen, fisikal eria, distrik Hetkwata na komyunikesen em ilektoral baundri komisin bin plenim pinis. Dispela foapela strongpela tingting i soim klia pinis long taim Hiri Lokol Level Gavman Haoda Rogea i tok klia long Mirigeda bung. Mista Agarobe i tok dispela foapela bikpela tingting soim tredisenel laipstail i mekim dispela tupela hap pipel i no wankain bikos Kairuku i gat

narapela pasin long ol Hiri. “Tasol mi laik tokim ol pipel olsem sistem bilong gavman bilong yumi i save bungim yumi olgeta olsem wanpela pipel na ol patisipesen long wankain mak long olgeta pipel namel long ol tupela lain pipel bilong Kairuku na Hiri. “Maski olsem ilektorel baundri komisin i ting dispela foapela as tingting inap brukim ol pipel dispela samting i no bin kamap inap nau,” em i tok. Gavana i tok sapos Kairuku-Hiri i bruk bai ol inap mekim Sogeri kamap olsem taunsip bilong Hiri distrik. Em i tokim Kairuku-Hiri ilektoret pipel long Mirigeda olsem planti hevi tu i save paulim tingting bilong Sentral provins ol edministresen na ilektorel baundri na dispela em wanpela isu ol i wok long toktok long en.

Joseph Dawai i raitim