PAPUA Niugini i laikim gutpela lidasip long dispela taim bihain long kamap bilong sik coronavirus (COVID-19) na ol arapela salens, Presiden bilong Katolik Profesinel Sosaiti (CPS), Paul Harricken i tok.

Em i tok moa yet, long dispela taim we kantri i lukluk long holim 2022 Jeneral Ileksen.

Em i mekim dispela tok long las wik long Pot Mosbi long taim sosaiti i holim enuel jeneral miting (AGM) na tu votim ol nupela ekseketiv bilong em. Em i mekim dispela tok tu long strongim tingting bilong manmeri bihain long dai bilong Sir Michael Somare long stat bilong dispela yia. Long bung bilong CPS na insait long ileksen bilong ol ekseketiv, sosaiti i votim gen Harricken olsem presiden. Ol arapela ekseketiv insait long sosaiti em Dokta Patricia Paraide i kamap vais presiden, Michael Varapik, Collin Yaum, Embeseda Gabriel Dusava, Kila Ai (em saitim i votim ol olsem tresera, seketeri na

ol ekseketiv bilong sosaiti) wantaim Mis Florence Sariman (husat  ol memba i votim tu olsem memba bilong ekseketiv komiti). Mis Jean Kekedo i no laik long resis gen olsem vai presiden bikos long ol pesinel hevi em i gat long em. Harricken i tok tenkyu long Kekedo long komitmen na sapot bilong em long taim em i bin stap long ekseketiv. Long wankain taim, em i tok welkam long olgeta memba bilong sosaiti na ol ekseketiv na i tok  em i wok bilong sosaiti long lukim olsem ol i soim gutpela pasin bilong wok; long komitmen na dedikesen. Em i tok dispela i kisim tu bilip bilong ol. Seketeri Jeneral bilong Katolik Bisop Konprens (CBC), Pater Giorgio Licini na Komyunikesen na Yut Seketeri bilong CBC, Pater Ambrose Pereira i bin stap tu long dispela kibung. Pater Ambrose i wok tu olsem Spiritual Dairekta bilong CPS. Harricken i tok COVID-19 i kam wantaim ol salens bilong em.

Em i tok CPS i stap tu long soim manmeri long rot bilong stap. Em i tok bikos long ol salens COVID-19 i bringim, planti ol ogenasisen i no bin inap long kamap wantaim ol plen bilong 2020. Em i tok maski long dispela, manmeri i mas luksave olsem COVID-19 bai i no inap pinis tasol bai i stap yet na manmeri i mas painim nupela rot o wei bilong stap. Harricken i tok long wok bilong 2022 ileksen, manmeri i mas tingting gut long husat man o meri ol bai votim long makim ol long palamen. Em i tok bihain long Papa bilong Kantri, “Great” Gren Sif Sir Michael Somare i dai, ol salens bilong mekim wok politik na kamapim wok divelopmen i stap yet. Em i tok long salens bilong daunim ol hevi i pas long jenda beis vailens (JBV), kamap bilong “Individual & Community Rights Advocacy Forum (ICRAF),” lo i ken helpim ol lain husat i bungim dispela hevi.