I nogat nesenal opis bilong kisim namba bilong ol manmeri na pikinini husat i save gat hevi long famili olsem pasin bilong paitim meri o pasin bilong bagarapim pikinini.

Wanpela wok man bilong Consultative Implementation na monitoring Council (CIMC) Charles Esshyhafo i tok, “Ol i nogat namba bilong ol manmeri na pikinini husat i save gat hevi long haus.” Ol i save kisim namba bilong ol long ol niuspepa taim ol ripot i kamap. Em i tok, “Planti hap i gat ol manmeri i wok long gat ol hevi long famili tasol mipela i hat long go na lukim ol na toktok long ol. Ol dispela namba mipela i kisim planti bilong ol em insait long Mosbi tasol. Dispela i soim olsem ol narapela hap tu i  gat ol kain hevi  i wok long kamap i stap. Mista Esshyhafo i tok, “I gat hap bilong kisim helpim i stap olsem polis, haus sik, kaunseling senta, na ol arapela hap i stap long helpim ol dispela lain. I gat ol seifhaus tu i  stap long helpim ol mama husat i save pret long go long haus taim ol i toktok long wanem hevi ol istap long en long polis na ol  lo man.

Samantha Solomon i raitim