LONG Tunde 24, 2021 Praim Minista i bin welkamim tupela memba bilong Palamen i go long Pangu pati bihain long ol i lusim Nesenel Alaiens pati. Tupela em Memba bilong Saut Bogenvil na Minista bilong ICT, Timothy Masiu na Memba bilong Bogia, Robert  Naguri.

Praim Minista Marape i tok em i amamas long welkamim tupela gutpela kwaliti memba i go long Pangu Pati. Em i tok tupela wantaim i kam long tredisinel Pangu ilektoret. Bihainim namba wan palamen lida bilong Pangu Pati, Sir Paul Lapun bilong Bogenvil long Buin distrik husat i bin salim dispela lidasip i go long Sir Michael Somare na em i pait long kantri bilong PNG long kisim independens. Praim Minista Marape i tok nau Mista Masiu i kam bek long hap we ilektoret bilong em i bin fomim bipo na i kontribiut i go long kamap bilong Pangu Pati. Praim Minista i tok stap bilong Mista Masiu long Pangu Pati bai helpim gavman long kamapim win-win solusen bilong Bogenvil  independens na PNG wantaim. Robert Naguri tu i kam long bekgraun bilong  Pangu Pati na Nesenel Alaiens. Tupela i gat strongpela histori bilong Sir Michael Somare we ol pipel bilong Bogia em ol bikpela sapota bilong Sir Michael Somare. Mista Masiu i bin givim resignesen pas bilong em i go long Nesenel Alaiens pati bipo long Praim Minista i mekim dispela toksave. “Mi tok tenkyu long Praim Minista Marape na olgeta memba bilong Pangu Pati long welkamim mi long Pangu Pati. Dispela em impoten muv tru mi mekim. Dispela pati i sanap strong tru long lo yia i go pinis i kam inap nau na tude mi kamap hap bilong en,” Mista Masiu i tok. Em i tok astingting bilong em long muv i go long Pangu Pati em bikos long lukluk na laik bilong em yet. Em i laikim gutpela  lidasip bilong Praim Minista na em i laik wok bung wantaim em long bringim kantri i go long narapela level. Em i tok maski i gat planti salens i stap, Mista Masiu i redi long wok wantaim Praim Minista long brukim ol dispela salens na go hetim wok bilong gutpela lidasip long bringim gutpela sindaun long PNG. Em i tok tenkyu long Nesenel Alaiens long taim em i bin wok wantaim ol. “Bogia em i Pangu Pati na Nesenel Alaiens wantaim. Mi joinim Pangu Paiti long pait long rait bilong ol pipel bilong mi long Manam Ailan. Mi laik wok wantaim Praim Minista bai em i ken harim wari bilong mi long ol pipel bilong Manam Ailan,” Mista Naguri i tok.

Carolyne Ketsimur i raitim