MEMBA bilong North Fly James Donald i bin askim Praim Minista James Marape long las wik palamen kibung olsem inap gavman i rausim pesenel inkam takis long kantri.

Mista Donald i tok olsem taim gavman i mekim olsem dispela bai mekim isi long em i kisim gut mani long wanem pablik i gat pawa bilong yusim mani we ol bai baim ol samting na gavman i ken kisim takis gut long ol bisnis haus. Praim Minista Marape i bin bekim dispela askim no gat toksave olsem i gat tripela takis we nau i karim kantri stap, em pesenel inkam takis, kopret takis na GST takis na namel long dispela ol tripela takis bilong kantri em pesenel inkam takis i stap namba wan long kantri. Marape i tok tenkyu long gutpela askim bilong Memba James Donald na tok gavman i no stap long gutpela mak bilong katim takis. Em i tok mak bilong olgeta inkam gavman i save kisim em sindaun long K10 i go K11 bilien na bai no inap long katim takis. “Mipela i mas amamas long ol wok pipel long kantri i mekim long karim dispela kantri go fowat,” Praim Minista i tok, long neks 5 yia o 6 yia taim ikonomi bilong kantri i ran orait em bai gavman lukluk long katim pesenel inkam takis. Em i tokaut olsem aninit long lidasip bilong Sam Koim IRC i kolektim takis long kantri na dispela revenyu gavman nidim long fandim baset  bilong kantri. Mak bilong baset em K16, K17 na K18 bilien. Em i tok dispela ol takis bilong kantri em K5.6 bilien i save go long ol salari, K2 o K3 bilien i save go long pawa na wara, K8-K9 bilien i save go long ol arapela nid na K2 bilien tasol i save go long edukesen na DSIP. “Gavman bai traim long wok bung wantaim na bungim olgeta blak maket long kantri long  peim takis na serim dispela takis wok wantaim long groim inkonomi bilong kantri na bai lukim impruvmen bilong katim takis bikos long nau gavman i no inap katim takis,” Marape i tok.

Jacklyn Kimala i raitim