PALAMEN i mas gat sia bilong meri stap long makim maus bilong ol meri na sindaun long olgeta palamen bung long serim tingting bilong olgeta faivpela rijon bilong Papua Niugini.

Dispela em wanpela bikpela askim long taim bilong palamen sindaun long las wik taim Siaman bilong  bilong Spesel Komiti bilong Jenda Beis Vailens na Memba bilong Alotau Charles Abel i bin askim long taim em bin putim long tebol bilong palamen dispela ripot bilong wok painimaut bilong GBV long kantri. Praim Minista James Marape i bin bekim tok olsem bai i gat

wanpela spesel sia bilong ol meri long palamen bihain long lukim olgeta wok rekot long pasim wanpela meja lo na lukim ol meri husat i laik resis long sia i mas pefom gut long taim bilong ileksen namel long olgeta faivpela rijon long i ken kisim sia long palamen. Em i tok dispela bai kamap bihain long olgeta politikol pati lida i holim wanpela bung wantaim bilong toktok long dispela risev sia bilong ol meri long palamen. “Mipela bai putim sia bilong meri bikos planti hevi bilong meri long kantri na tu man o meri i gat ikwal rait long sindaun long palamen kibung na serim tingting wantaim na luk fowat long divelopmen bilong kantri,” Marape i tok.

Jacklyn Kimala i raitim