PAPUA Niugini Imaigresen na Sitisensip Dipatmen aninit Papua Niugini Gavman i redi long kisim sampela Afghanistan refuji i kam long Papua Niugini.

Dispela em long aninit long humeniterien eid (pasin bilong lukautim laip bilong man). PNG Sif Maigresen Opisa, Stanis Hulahau i mekim dispela tok long taim Katolik Bisop Konprens (CBC) bilong Papua Niugini na Solomon

Ailan i bin singautim wanpela pres konprens long asde long tok bilong helpim olAfghanistan refuji long dispela taim. Kantri Afghanistan nau i bungim bikpela hevi taim strongpela Islamik fandamental relijen grup, Taliban i rausim trupela gavman bilong Afghanistan long tupela wik i go pinis na i kisim ples na ranim kantri. Taliban i kisim ples bihain tasol long Amerika gavman i mekim disisen na rausim ami bilong em long go bek long Amerika.

Amerika ami i bin go was na helpim long lukautim Afghanistan long 2001 taim em i painim wanpela Islamik fandamental grup tu em, Al Quida husat i bin hait na yusim wanpela Amerika pasindia balus na go bomim tupela bikpela haus long Nu Yok Siti we i kilim moa long 3000 manmeri na bagarapim planti samting bilong siti na kantri wantaim. Bihain long dispela nupela Amerika gavman i laik bai Amerika ami i mas i go bek bikos planti opisa bilong ol i dai nating long hevi bilong lukautim lo na oda bilong narapela kantri. Taim Amerika ami i bin stap na strongim lo na oda, planti Afghanistan manmeri i gat fridom long mekim wanem samting ol i laik mekim, olsem ol meri i fri long go long skul, mekim ol wok, stap long gavman na wokim wanem samting ol i laik mekim. Tasol taim Amerika gavman i lusim kantri, em i no bin save olsem Taliban i bin redi gut long rausim Afghanistan gavman na ranim gen kantri. Dispela i mekim planti Afghanistan i pret long fridom bilong ol na i laik ranawe long kantri. Long dispela as PNG Imaigresen na Sitisensip opis aninit long PNG gavman i tok PNG i redi long kisim sampela bilong dispela ol refuji. Mista Hulahau i tok sapos ol Afghanistan refuji taim ol i kam long PNG tasol bihain i laik go long narapela kantri, PNG bai helpim long toktok wantaim ol arapela kantri we ol i laik go na stap long ol. Long nau yet, i gat olsem 20 Afghanistan (19 long Mosbi na wanpela long Manus) i stap long ol ditensen senta. Long wankain taim, CBC i mekim solidariti (yuniti) na humeniterien singaut long risetelim ol 20 Afghanistan husat i stap yet long PNG. Em i tok dispela ol refuji i stap nating inap long 8-pela krismas olgeta bihain long ol i kam long kantri long 2013 aninit long program bilong ol gavman bilong PNG na Australia. Em i askim tu ol arapela kantri long Esia rijen long luksave na kisim tu dispela ol refuji i go long kantri bilong ol.

Paul Zuvani i raitim