GAVANA bilong Benk bilong Papua Niugini (BPNG), Loi Bakani yet bai tokaut long as em i no sapotim ripot bilong Fainensel Analisis na Supavisen Yunit (FASU) ripot long sut toktok bilong mani londering insait long Benk Saut Pasifik (BSP).

Tresera Ian Ling-Stuckey i mekim dispela tok long taim em i bekim askim bilong Memba bilong Komo-Magarima, Manasseh Makiba long Palamen kibung las wik long wanem samting em bai mekim sapos em i painim ol gavman opisa i asua long toktok bilong mani londering. Mista Makiba i askim long husat em dispela politikali ekspos pesen (politically exposed person – PEP) na inap Mista Ling-Stuckey i ken tokaut long nem bilong dispela man na ol arapela 8-pela kastoma bilong BSP em sut tok bilong mani londering i pas long ol. Mista Ling-Stuckey i tok em i bin askim long kisim FASU ripot o i laik save long ol toktok i stap insait long sut tasol  i no inap. Em i tok FASU, aninit long lo i banisim wok bilong em olsem em bai i no inap long tokaut long kain ripot olsem. “Mista Spika, mi givim instraksen long Treseri Dipatmen na Benk ov PNG long mekim wok painim aut bilong ol,” Ling-Stuckey i tok. “Taim mi kisim dispela ripot mi ken

mekim wanem kain mekimsave mipela bai givim ol lain husat i pas long kain sut tok.” Ling-Stuckey i tok nau yet ol wok painimaut i wok long go het tasol i no tokaut long taim dispela wok painimaut bai pinis. Ol sut toktok bilong mani londering i kamap bihain long wanpela ripot i kamap long Australia Financial Times i tok long wanpela propeti bilong wanpela senia politik man i stap klostu long Sydney Haba (Australia) em ol i salim na kisim mani olsem mak bilong K85 milien. Dispela mani em ol i salim i kam long kantri aninit long lukaut bilong BSP.