DIPATMEN bilong Pesinel Menesmen i givim wanpela toksave long ol pablik sevan olsem tude em i pablik holide. Dispela long wanem tude em 26 Ogas, de gavman i makim olsem Nesenel Ripentens De. Ol pablik sevan i no ken go wok tasol i mas stap isi long haus na pre.

Ol i ken go bung wantaim ol arapela long bung ples we bikpela grup i pre na dediketim kantri i go long Bikpela. Het tok bilong Ripentens De bilong dispela yia em “Let us unite to seek God through Earnest Prayer and humble repentance.” Dispela i min olsem wantaim laik bilong prayer na daun pasin yumi bung wantaim na askim long helpim bilong em. Pasto Roger Joseph, Jeneral Seketari bilong PNG Kaunsil ov Sios (PNGCC) i tok dispela het tok i askim yumi manmeri long Papua Niugini i mas tanim bel na mekim wok tu olsem yumi ken kisim helpim long God. Em i tok rit long Gutnius bilong Jon 10:10 Jisas yet laip na laip i kam long em. Wantok Niuspepa i bilip, planti manmeri bai kamap long dispela kain ol bung long wan wan ol senta long kantri. Long Pot Mosbi, prea bung i save kamap long Sir John Guise Stedum. Long yia Praim Minista James Marape i long prea bung long Sir John Guise Stedum i bin tok bikos long wok bilong ol misineri Papua Niugini i kamap Kristen kantri. Em i tok sapos ol misineri i no bin bringim Tok i kam long namba wan taim, kantri bai i no inap kamap olsem em i stap nau. Em i bin dediketim gen PNG olsem Kristen kantri bihainim tingting ol papa bilong kantri i mekim. Em i bin askim tu mausman bilong ol manmeri bilong ol narapela kantri long go bek na tokaut long kantri bilong ol olsem ol i bin stap long wanpela Kristen kantri na PNG i Kristen kantri. Long 2007 Gren Sif Sir Michael Somare husat i bin stap Praim Minista long dispela taim i bin tok orait long makim dispela de olsem Repentens De. “Dispela i no Pablik Holide. Nogat. Dispela em i de long tok sori long asua bilong yumi na tok sori long God,” Marape i tok. “Em i de yumi i mas tok tenkyu long God. “Tude mi sanap olsem Sif Sevan bilong dispela kantri long givim luksave olsem bikos long God, em nau mi stap. “Mi givim ona i go long God na givim glori long em. “Yumi mas givim olgeta samting bilong yumi i go long God bikos long em, olgeta samting i kamap.”

Marape i tok maski kantri i gat planti tok ples na kalsa, long God yumi kamap wanpela kantri. Em i tok maski sapos yumi kamapim ol helt, edukesen na ol arapela samting, tasol sapos yumi i no givim luksave long God, olgeta dispela samting i samting nating. Em i tok taim em i tok long kes (curse) pastaim, em i tok long ol manmeri husat i yusim ol pablik samting o husat i bihainim ol rot nogut olsem braiberi long kisim ol samting na dispela tok em i mekim i no go long kantri. Em i tok PNG i Kristen kantri na bai stap olsem Kristen kantri. Maski liklik ren long moning na bihainim bikpela san i kamap, planti manmeri no wari na kamap long bung long prea. Ol arapela Memba bilong Palamen olsem Minista bilong Komyuniti Divelopmen Wake Goi, Minista bilong Trenspot William Samb na Memba bilong Pomio, Elias Kapavore na ol arapela bikpela manmeri i kamap long bung long Sir John Guise Stedum.