Nesenal Pandemik Kontrola na Polis Komisina David Manning i no amamas tru long India Hai Komisin long bikhet pasin ol i mekim taim ol i trik na kisim i kam insait long Papua Niugini ol pasindia wantaim nogat tok orait.

Namel long ol dispela pasindia foapela i gat COVID-19. Mista Manning i tok, “Mi askim Papua Niugini Dipatmen bilong Foren Afeas pinis long dil wantaim India Hai Komisin bihainim ol stretpela

diplomatic rot. Long wankain taim sata kampani na balus kampani na husat ol namel man bai i kisim mekimsave long bikhet pasin bilong ol. “Wanem samting Hai Komisin bilong India i winim insait long dispela pasin em long daunim trast bilong wanpela pren kantri. India i mas rispektim Papua Niugini olsem wanpela soveren kantri, na i no ken wokbung wantaim ol husat bikhet manmeri na mekim ol eksen long brukim lo bilong mipela na lukdaun long ol pablik helt na sefti mesa i stap pinis.

“Bikos Hai Komisin bilong India i soim pasin i nogat rispek long pipel na gavman bilong Papua Niugini, nau mipela i putim tambu we i no inap pinis yet long olgeta balus i kam long India na i laik kam insait long easpes bilong Papua Niugini inap narapela toksave i kamap,” Mista Manning i tok. Em i tok moa olsem strongpela sefti mesa i stap long stopim ol balus i kam long PNG long banisim kalap bilong COVID-19 Delta Variant long kam long India.

“Gavman bilong mipela i mas putim ol strongpela mesa long banisim Papua Niugini long COVID-19 Delta Variant we i kilim planti handret tausen pipel long India pinis. Long dispela as na mipela i tok nogat foapela taim pinis long balus i kam olsem long India i no ken kam insait long Papua Niugini. Mipela i givim tok orait tasol bihain long mipela i wanbel wantaim ol representativ bilong India Hai Komisin long sampela mesa mipela i putim. Namel long dispela ol mesa em hamas pasindia i ken kam long wanpela balus na olgeta pasindia i mas kisim COVID-19

PCR tes tupela de pastaim long ol i kalap long balus na kam. “Namba wan samting em ol i brukim dispela wanbel bilong hamas pasindia i ken kam taim gavman bilong India i larim 81 pasindia i kalap long balus long kam long Papua Niugini. “I tru sampela dispela ol pasindia em ol pipel bilong Papua Niugini, na olgeta arapela em ol i holim visa i orait long ol i stap long Papua Niugini tasol gavman bilong India i brukim wanbel bilong mipela long larim planti long trevol. “PNG gavman na Nesenel Pandemik Kontrola i bin kisim

toksave tasol bihain long balus ya i pundaun long Indonesia long kisim fiul na ol i toksave long hamas pasindia ol i karim i kam long Pot Mosbi. “Mipela i bin tingting long tanim balus i go bek tasol dispela bai i no gutpela long ol pipel bilong mipela i stap long balus na ol arapela husat i orait long kam. Namba tu samting Mista Manning i tok gavman bilong India i larim sampela pasindia long kalap long balus na i no kisim COVID-19 tes na soim olsem ol i nogat sik COVID-19. Dispela pasin i min olsem balus ya i karim

foapela pasin wantaim COVID-19 i kam insait long Papua Niugini. “Mipela i laki tru dispela foapela i kamap orait nau na olgeta arapela pasindia i mas kisim tes na ol risal bilong ol i soim ol i nogat COVID-19. Dipatmen bilong Foren Afeas bai i salim wanpela pas long Embeseda bilong Indonesia long tok klia long wanem hap wok ol tu i mekim insait long dispela bikhet pasin. Dispela em bihainim ol Indonesia pasindia husat i kalap tu long balus na ol eksen bilong Garuda Indonesia olsem balus kampani bilong gavman bilong Indonesia.