PLANTI ol bisnis haus long Madang provins i no wanbel tru long Nesenel Eapot Koporesen (NAC) na kontrakta husat i wokim ekstensen wok long Madang ples balus long surikim taim gen long opim bek ples balus.

Maus bilong ol bisnis haus na longtaim bisnis man long Madang, Sir Peter Barter long pastaim i no amamas long wok dispela kontrakta em NAC i kisim long mekim ekstensen wok. Dispela long wanem wok i kamap isi isi tru. Presiden bilong Madang Semba ov Komes na Indastri, Kevin Murray i no amamas long NAC i surikim taim gen bikos dispela bai pasim ol bisnis haus na pablik manmeri bilong Madang long go kam o ol manmeri long narapela hap i go long Madang. Long las wik tasol NAC i tokaut olsem ol i surikim taim gen long narapela 6-pela de. NAC i givim toksave long Air Niugini olsem ol ran bilong balus bilong Air Niugini i go olsem long Madang we kampani i stopim stat long Julai 23 i go inap Ogas 16 em ol i surikim taim i go narapela 6-pela de gen. Long wanpela toksave we Air Niugini i tokaut long em long Madang taun opis bilong em na tu long Madang eapot, ol i tok olsem bikos long wok nau i go het yet long Madang eapot we i lukim olsem plesbalus bai pundaun long en em i sotpela na i no inap long kisim ol balus bilong Link PNG na Dash 8. Dispela i min tu olsem em i no seif long ol i karim ol pasindia na kago i go olsem long Madang. Air Niugini i tok sori tru olsem ol i muvim taim bilong ran bilong balus bilong ol i go long Sande, Ogas 22 bihain long wok bilong ekstensen i pinis. Air Niugini i tok sori long ol pablik husat i save yusim sevis bilong en na i tokaut olsem ol i stap wet long ran bilong Dash 8 balus bilong ol i go long Madang stat long 23 Ogas. Long Julai taim Air Niugini i stopim ran bilong en i go long Madang, wanpela “Third” Level balus kampani em Tropicair i bin bringim sevis i go long Madang. Tasol dispela i bin stop bikos long wok i kamap long ples we balus bai ran long em. Long nau yet ol bisnis lain long Madang i save ran long kar i go olsem long Lae Nadzab Eapot na kisim balus na go long ol arapela senta.

James G. Kila i raitim