DIPATMEN bilong  Pesenel Menesmen (DPM) i bin givm ful pawa na wok i go long Pablik Sevis bilong Atonomus Rijon Ov Bogenvil long Ogas 4, 2021.

Dispela iven i bin kamap long Buka long Bogenvil we Pablik Sevis Minista Joe Sungi na Sekretri bilong DPM Taies Sansan i bin stap long mekim fomal henova i go long ABG Pablik Sevis.

Long taim em i givim toktok bilong em, Pablik Sevis Minista i tok amamas long bikpela wok we ol bipo Minista na Sekretri i bin mekim long statim proses bilong dispela wok kamap. Pablik Sevis Ministri i bin statim sapot bilong en long Bogenvil gavman long yia 2012. Em i bin helpim Bogenvil Gavman long trensisenal stej i go inap long kamap bilong Pablik Sevis .

“Mi amamas bikos long gutpela wok bung wantaim bilong mipela aninit long Bogenvil Pis Agrimen 2001, yumi kisim planti gutpela samting, statim wantaim straksa bilong Bogenvil Pablik Sevis na Ki hiumen risos menesmen polisi, gaidlain na ol proses. I gat moa wok long mekim bilong impruvim hiumen risos menesmen long Bogenvil Pablik Sevis na Nesenel Pablik Devis na Ministri bilong mo bai go het long sapotim Bogenvil Pablik Sevis na Atonomus Gavman,” Mis Sansan i tok.

Mi tok amamas long ol wok we i bin kamap bihain long ol i kamapim Bogenvil Pablik Sevis. Sekretri Sansan i tok long Dipatmen bilong em i bin givim 7-pela pawa long 2012 taim dispela proses i bin stat. Em ol, Kamapim opis, Kontrak bilong wok, Salaris na Alauens, in-kantri trening, resignesen na miselenius. Long dispela iven, ol i givim laspela 4-pela pawa. Em ol, Givim aut ol fail namba, komplaens bilong oflain peimen, ritaiamen na ritrensmen na ovasis trening na skolasip.

Mis Sansan i tokim ABG Pablik Sevis long kamapim Pablik Sevis Komisen.

Carolyne Ketsimur i raitim