SPESEL Palamen Komiti long Jenda Bes Vailens i mekim moa long 20 rekomendesen long palamen las wik taim ol i putim long tebol bilong palamen ripot bilong wok painimaut bilong ol long jenda bes vailens long Papua Niugini.

Siaman bilong Komiti na Memba bilong Alotau Open Charles Abel i tok dispela ol rekomendesen i makim hau ol sevis bilong helpim i bagarapim na stap na planti tru ol sevaiva bilong jenda bes vailens bai i tok ol i no inap kisim sevis long jastis. Long mun Mas Spesel Komiti bilong GBV i bin harim ol ripot long ol vailens nah au sistem I feilim ol victim. Komiti i no bin amamas tru long harim hamas ol viktim i mas wet longpela taim tru long ol lain husat i stap long ples bilong helpim i ken mekim investigesen long komplen bilong ol na karim i go long kot. Komiti i no amamas tu long harim olsem ol keis i go long kot i no save go long pinis bilong ol. “Mipela i harim olsem long las yia Royal Polis Komisin bilong PNG i rejisterim 15,000 keis tasol 300 tasol bilong ol keis i go long kot na 100 tasol i kisim mekimsave long kot. “Spesel Komiti i bin kalap nogut long harim Polis Minista na Polis Komisina wantaim i tok stret long pablik hiaring long mun Mas long kepesiti bilong polis long adresim GBV,” Mista Abel i tok. Taim tupela i bin kisim askim, ‘sapos wanpela meri i go long polis stesin long kisim helpim long GBV tupela inap tok stret olsem polis i ken banisim ol?’ Tupela wantaim i bin tok stret olsem ol i no inap. Mista Abel i tok, em i gutpela Minista na Komisina bilong Polis i tokaut stret “tasol dispela rispons i mas senis.” “Mi laik tok long ol polis olsem; Yu gat duti long pablik long banisim na sevim ol. Em i wanpela sekred (tambu) duti. “Taim wanpela man, o meri wantaim pikinini i kam long yu bikos ol i kisim bikpela pen pinis wok bilong yu em long helpim. “No ken mekim ekskius. “No ken giaman na tok kalsa bilong mipela i orait long dispela kain pasin. “Mekim wok bilong yupela. Mekim wok painimaut, arestim na kotim husat I kamapim hevi,” Mista Abel i tok.

Rosa Koian i raitim