OL Memba bilong Palamen i mas givim sapot long nupela Memba bilong Mosbi Not-Wes, Lohia Boe Samuel.

Minista bilong Petrolium na Eneji na Memba bilong SinasinaYonguml, Kerenga Kua i mekim dispela tok long givim tok welkam long Samuel long Palamen kibung long las wik. Em i mekim dispela tok tu bipo long em i bekim askim bilong Gavana bilong Galp, Chris Haiveta long wok bilong Twinza oil kampani long Pasca oil fil long Galp. Em i tok Samuel i no nupela man long em long wanem, pastaim long dispela Samuel wantaim em i save long ol yet long ol praivet sekta bipo long em i kamap Memba bilong Palamen. Em i tok Samuel i wanpela gutpela strongpela man bilong wok, i bihainim lo na i gat gutpela pasin bilong wok bisnis.

Em i tok wantaim dispela ekspiriens, Samuel i ken yusim dispela save taim em i stap memba bilong palamen. “Wanpela samting em mi laik tokaut olsem em Mosbi Not-Wes i wanpela bikpela tok, moa long ol lokol manmeri,” Kua i tok. “Long dispela as mi askim ol Memba bilong Palamen olsem, wanem ol toktok em Samuel i kamapim, yumi mas harim gut. “Ol kain hevi olsem graun bilong ol papagraun, em yumi mas putim yau gut. “Yumi i no inap long kamapim kain wok olsem yumi save mekim nau na i go moa yet. “Wanem kain ol wok Memba i laikim, praim minista na ol minista olsem Fainens, Tresera na Nesenel Plening olsem yupela i mas putim gut yau nau na sapotim em long dispela sotpela taim bilong palamen.”