DIPATMEN bilong Komyuniti Divelopmen na Rilijon i kamapim 5-yia fanding plen bilong Gavman Pablik Invesmen program long askim K37 milien we bai ol yusim K7 milien long wan wan yia na karim aut wok bilong Jenda Beis Vailens (GBV) long Kantri.

Dispela 5-yia plen i kamap bihainim ol planti GBV keis long olgeta hap bilong kantri we no gat gutpela sapot na helpim i save kam long ol Gavman sevis insait long kantri. “Moa long tausen manmeri husat i ekspriensim dispela GBV long kantri tasol bilong wanem na i no inap long kisim jastis bikos no gat gutpela Nesenel GBV Bodi we i ken protektim ol dispela manmeri na pikinini husat i stat wantaim kainkain vailens,” Siaman an Gavana bilong Alotau Open Charles Abel i bin tokaut long namba wan ripot bilong GBV spesel komiti long palamen las wik. “Mipela i save olsem Dipatmen bilong Komyuniti Divelopmen na Rilijon i no bin gat wanpela strongpela baset plen dokumen long las deit tasol long las mun ol i bin kamap wantaim dispela 5-yia plen bihain long lukim planti GBV ripot data bilong Nesenel Helt Sistem Data Beis na long 2018 PNG Demograpik Helt Risets,” Siaman bilong GBV Spesel Komiti Charles Abel i tok. “Mipela i askim Treseri na Nesenel Ekseketiv Kaunsil (NEC) long luksave na fandim dispela 5-yia plen na apdeitim dispela baset long kodinetim GBV wok gut insait long kantri bikos GBV long kantri nidim mani bilong bildim Kaunsiling senta, seif haus, komyuniti beis privensen ektiviti na mani bilong daunim Sanguma vailens,” em i tok. “Planti stori na ripot bilong GBV long kantri i mekim mipela pilim sem long i no protektim ol dispela pipel husat i nidim help bihain long ekpriensim GBV,” em i tok. “Bihain long dispela ripot mipela ol spesel Komiti bilong GBV i askim Treseri na Dipatmen bilong Jastis na Atoni Jenerel, PNG polis, Mejistret na Nesenel Kot, Ministri bilong Helt na HIV AIDS na Minsitri bilong Yut na Komyuniti Divelopmen i mas wok bung wantaim long draivim GBV Stratiji. Em i tokaut klia long olgeta memba bilong palamen long lukluk ausait na kisim ol spesel pipel husat i gat moa save long GBV wantaim gutpela netwok na strongpela save pinis long karim aut GBV wok bilong kantri. Long wankain taim tu palamen i mas apruvim 10-pela posisen bilong ol wokmanmeri bikos komiti i bilip olsem setim olgeta GBV bodi bai i ken helpim sistem long wok gut.

Jacklyn Kimala i raitim