TOKTOK bilong mekim Papua Niugini i kamap Kristen kantri bai no inap mekim nogut long wanpela man o meri.

Siaman bilong Constitutional  na Law Reform Commission (CLRC) Kevin Isifu i tok, “Sapos Papua Niugini i kamap wanpela Kristen kantri em bai no inap mekim nogut long wanpela man o meri bilong kantri.” Ol toktok mipela i putim bai no inap mekm wanpela samting long ol brata na susa bilong yumi husat i no gat bilip long Kristen bilip. Komisina bilong CLRC Mis Martha Kokiva, CLRC Sekreteri Dokta Mange Matui, CLRC Senia Menesmen, Ekting sekreteri bilong Dipatmen bilong komyuniti development na ol arapela olsem ol wok man long opis bilong Praim MInista tu i  bin go stap long dispela presentesen. Mista Isifu i tok 70 pesen bilong ol pipel long kantri long olgeta 21 provins i laikim PNG i mas gat fridom bilong Kristen bilip. Dispela ol wok i bai nidim taim long mekim na  em bai go long planti proses long pinisim dispela wok. Gavman i mas luksave long ol rekomendesen mipela i givim bilong mekim PNG wanpela kristen kantri. Em i tok amamas long sapot bilong gavman long sapotim CLRC long mekim ol dispela wok hariap. Wok bilong lukluk gen long wok blong mekim PNG kriten kantri i kamap long 6-pela wik tasol na Praim Minista i bin tokaut long 23 Epril, 2021. Ol narapela wankain wok i save kisim 18 mun long mekim. CLRC i  tok amamas long husat i bin helpim long mekim dispela wok i kamap klostu long pinis bilong en. CLRC i luksave long Dipatmen bilong Rilijon na Dipatmen bilong Jastis na Atoni Jeneral long helpim bilong ol tu.

Samantha Solomon i raitim