MINISTA bilong graun na Memba bilong Lae, John Rosso i tok Gavman i mas holim yet graun em bin lisim long ol arapela o praivet sekta bihain long 99 yia.

Em i tok dispela i ken mekim gavman i gat graun yet bilong mekim wok divelopmen. Em i mekim dispela tok taim em i bekim askim bilong Memba bilong Abau, Sir Puka Temu long Palamen kibung long Tunde dispela wik. Sir Puka i bin askim sapos gavman i ken givim bek graun i go long ol papagraun olsem ol i ken yusim long kamapim ol wok na strongim ol yet.

Em i givim piksa long Robinson River graun long Abau we 99-yia lis wok kokonas na kakao i pinis na dispela ol graun we ol plentesin we i bin stap nau em bus i karamapim. Tasol Sir Puka i tok aninit long Len Ekt, Seksen 133, i no gat wanpela hap tok i stap olsem bihain long 99-yia lis ol papagraun i ken kisim bek graun. Em i tok dispela i ken kamap taim gavman i gasetim o edvetaisim olsem ol papagraun i ken aplai, kisim na mekim wok divelopmen. “Alienated” graun i narapela long “customary” graun. Alienated graun em graun gavman i bin baim na kisim long ol papagraun long bipo taim long taim bilong Jemani, Inglan na Australia gavman. Customary graun em ol graun we i stap aninit yet long lukaut bilong ol papagraun. Mista Rosso i tok gavman i no inap long givim bek graun tasol i askim Sir Puka long em i sindaun wantaim ol papagraun, kamapim wanpela kampani, toktok wantaim Minista bilong Graun na Lens Bod na yusim lis aninit long gavman na mekim wok divelopim. Em i tok em i no gutpela gavman i givim graun nating i go bek long ol papagraun bihian long 99yia lis. “I no gat mining taim gavman i givim graun wantaim no gat gutpela plen bilong divelopmen,” Rosso i tok. “Mi amamas long alienated graun i stap aninit yet wantaim gavman olsem gutpela wok divelopmen i ken kamap.”

Paul Zuvani i raitim