WANPELA Viles kot long Is Sepik provins,, Dagua ino amamas long Is Sepik Provinsal Gavman i wok long givim planti atensen tumas long polis na viles jastis sistem nogat.

Na dispela hevi em i stap longpela taim nau. Seket klak bilong Dagua LLG long Urip ples, Peter Biago i bin autim dispela toktok bihain long Gavmana bilong Is Sepik Provins, Alla Bird i givim 8-pela nupela Nissan Patrol kar i go long Is Sepik Polis long Wewak. Mista Biago i sevim long Seket long 38 krismas i tok lo na oda hevi i stap longpela taim long Dagua na long olgeta hap long Is Sepik tasol gavman i wok long lukluk tasol long polis na komyuniti nogat. Em i tok ol viles kot i no save kisim helpim long fainens bilong sapotim ol opisa, lo na oda komiti, ol Alternative Dispute Resolution (ADR) ejensi, viles rekoda na ol arapela lain husat i save wok hat long bringim gutpela sindaun long viles level. Em i tok Urip viles kot ino bin kisim K20, 000 we i bin stap long baset bilong dispela yia long ranim operesen bilong en. Na long wankain taim Dagua LLG Menesa. Vincent Kawi ino bin inap long givim gutpela ansa long ol askim bilong ol taim ol i askim long dispela.

Mista Biago i tok “Mipela i save sindaun long graun, nogat sia na tebol long taim mipela i bung long harim kot. Mipela i nogat kar, mipela wokabaut tasol long ol ples long mekim ol wok bilong mipela. Na tu mipela ino save kisim pe long wok bilong mipela.” Em i tok Urip viles kot i gat mani mak long K3, 000 bilong kot fain tasol i nidim ol polis long strongim na sapotim dispela. Em i tok ol polis i save askim oltaim long mani bilong baim fuel long taim ol i laik mekim ares. Mipela i nidim dispela K20, 000 long mekim ol operesen bilong mipela. Mista Biago i tok. Siaman bilong Konstitiusinal Lo na Rifom Komisen na Memba biong Wewak. Kevin Isifu i tok ol viles kot em Nesenel wok na i kam aninit long Nesenel Judiseri sistem (NJS).

Cyril Gare i raitim