WOK bilong karim aut ol sevis bilong Famili na Seksuel Vailens long Papua Niugini em i no isi na em i laikim wokbung na strongpela netwok namel long ol patna.

CIMC-Famili na Seksuel Vailens Eksen Komiti i patna wantaim ChildFund (PNG) na i karim aut namba tu hap bilong projek ol i kolim ‘Strengthening services for survivors of family and sexual violence in PNG’ (Strongim sevis bilong ol lain i stap wantaim famili na seksuel vailens long PNG). Dispela namba tu hap bilong wok bai i lukluk long kamapim telepon kaunseling na referal helplain long strongim ol referal sevis long Is Nu Briten na Milen Be Provins. Astingting em long impruvim ol wok bilong helpim long daunim hevi bilong famili na seksuel vailens long dispela tupela provins. Namba wan hap bilong dispela projek i bin stat long 2015. Em i bin namba wan taim tru long PNG long launsim 1Tok KaunselinHelpim Lain, wanpela telephon lain we ol lain i bungim hevi bilong vailens long famili i ken ring na kisim helpim. Dispela sevis i bin inap kamap wantaim helpim bilong Nu Silan Ministri bilong Foren Afeas na USAID long PNG. Telepon namba 7150 8000 em ol lain i stap long vailens long famili i ken ring fri tasol enitaim olgeta de na kisim helpim. Olgeta lain long olgeta hap long PNG we i gat sevis bilong Digicel i ken yusim dispela sevis. Em i wanpela narakain na nupela sevis we i yusim mobail telepon teknoloji long helpim ol lain i stap long vailens na ol lain i kamapim vailens tu long kisim kaunseling na referel infomesen. Tupela bikpela samting dispela namba tu hap bilong projek i laik lukim long tupela provins em;  Namba wan em long sapotim provinsal famili na seksuel vailens kodinesen desk na ol sevis provaida long kamapim ol fomol kondisen rot insait yet long provinsal referal sistem bilong ol yet. Dispela em long kamapim wanpela sitem we i karampim gut olgeta nid, em i wok wantaim ol arapela displin tu, i gat gutpela kodinesen, na em i wok gut bihainim ol proses na i putim ol sevaiva i stap namba wan taim em i mekim ol rispons wok bilong ol. Namba tu em long mekim dispela wok wantaim ol provinsal edministreta na olgeta ki sevis provaida long provins. Dispela wik ol tim bilong CIMC-FSVAC na ChildFund (PNG) i stap wok bung wantaim ol stekolda bilong FSV long Alotau long strongim ol lokal referel rot long provins.  Dispela em i hap bilong wok na bikpela lukluk em long klia gut long ol lokal referel prektis na promotim helplain sevis.