PAPUA Niugini Difens Fos (PNGDF) Ea Trenspot Wing i kisim bek Casa P2-502 enjin bihain long ol i bin sevisim long Bandung, Indonesia.

I luk olsem long 7 krismas long PNGDF long bringim bek enjin bilong Casa balus bikos i no bin i gat mani na pepa wok ol i mas mekim long bringim bek enjin bilong balus. Tasol PNGDF Ea Trenspot Wing i amamas long sapot bilong Indonesia Armed Fos na Embeseda bilong ol long PNG Adriana Suprandy long bringim enjin long Trinde, Ogas 4, 2021. Embeseda Suprandy i tok wok PNGDF Casa enjin kam bek long kantribung wantaim long strong wok poroman namel long tupela kantri long strongim nesenel sekyuriti fos em i impoten tru. “Gutpela wok bung wantaim Indonesia na PNGDF em i stap longpela taim nau na bai gro strong aninit long lukaut bilong Triti ov komon rispek, frensip na koperesen tupela kantri bin sainim long 1986,” Suprandy i tok. Em i tok dispela taim em i soim mak bilong strongpela wok poroman bilong Indonesia gavman long givim Casa Ea Krap Enjin i go bek long PNG. PNGDF Komanda Philip Polewara i tok tenkyu long Indonesia Armed Fos long bikpela wok ol i bin mekim long bringim bek Casa enjin i kam long PNG wantaim helpim bilong PNG Foren Afeas. PNG Praim Minista James Marape i tok tenkyu tu long wok Indonesia gavman na promis long sapotim PNGDF ATW wantaim K50 milien fanding long helpim wok bilong ol insait long kantri. “Yumi i no bilding PNGDF long redi pait long woa tasol yumi mas helpim ol long protektim boda bilong yumi long ol kriminel ektiviti,” Marape i tok. Em i tok tenkyu long ol sevisman na meri long PNGDF na sivil sevis long sapotim na sevim kantri bilong yumi.

Joseph Dawai i raitim