LONG Mande Ogas 9 polis i holimpas wanpela wokman bilong PNG Imigresen na Sistisensip Atoriti (PNGICA) husat i bin go pas long mekim ol paul pasin long prosesim na givim aut ol visa long ol forena.

Opisa ya i bin ranawe hariap tru taim opis bilong em i mekim  wok painimaut long ol paul pasin long  visa. Dispela opisa i bin pasim tok na wok bung wantaim sampela visa ejen na givim aut sampela visa ausait long lo bilong PNG long ol forena nesenel. Ol i save wok long wiken na ol i stat mekim dispela pasin long 2019 yet i kam long 2020. Taim PNGICA i mekim odit long Boda Menesmen Sistem (BMS) bilong en em i painim planti asua na dispela i kirapim dispela wok painimaut. Hariap tru saspek i bin lusim wok bilong em na hait raun long tupela yia olgeta inap ol polis bilong Gordons Minor Crimes (Liklik Kraim) i luksave long em long Waigani long Mande las wik na holim em. Sif Maigresen Opisa Stanis Hulahau i tok i gat planti komplen long korapsen long opis bilong em i kamap pinis na taim em i kisim dispela wok em i wok hat long rausim dispela paul pasin long opis bilong em. “Inap nau opis bilong mi i salim 7-pela opisa i go long kriminel investigesen,” Mista Hulahau i tok.

Nau polis i holimpas pinis namba wan saspek dispela investigesen bai i go het nau na bai i lukluk long ol foren nesenel tu husat i wok bung wantaim em long kisim ol visa ausait long lo bilong PNG. Wanpela samting em olsem taim ol i wok long wikden ol i no save peim ol Maigresen Sevis Fi i go long Fainens Dipatmen.