OL refuji na asailum sika husat i stap long Papua Niugini na wet yet long go long narapela kantri i nidim planti helpim.

Wanpela helpim ol i nidim em kaunseling. Kodineta bilong Imigresen na Refuji Desk long Katolik Bisop Konprens Jason Siwat i tok planti bilong ol dispela lain i kam wantaim planti hevi long tingting na taim ol i kam na stap long ol banis bilong ditensen ol i save kisim moa hevi long tingting we i save givim hevi gen long bodi bilong ol. Long Pacific International Hospital i gat ol peisen bilong troma tasol i nogat planti kaunsila long helpim ol. Sista Mary McCarthy em wanpela tasol i givim sampela dispela helpim tasol nau long dispela

taim. Long stap long hotel em i luk orait tasol olgeta wan wan i gat ol nid bilong ol yet. Kain olsem sampela i gat sik na ol i nidim sampela kaikai bilong helpim ol. Long hotel em i hat long wanem ol hotel i gat standet menyu na sampela kaikai ol lain i stap wantaim sik i ken kisim bagarap long en. Long haus sik sampela i kisim marasin long helpim ol long malolo long ol wari bilong ol tasol dispela ol marasin i save kamapim narapela hevi. Sampela taim, taim ol i kisim nius olsem wanpela famili memba bilong ol i dai, ol i save kisim bikpela wari na i go i go troma i save kamap. “Mi save harim ol tu. Na sampela taim ol stori bilong ol i save kisim mi tu tasol i nogat ples we mi ken go stori na rausim,” Mista Siwat i tok. Ol dispela asailum sika i bin go long Australia long kisim helpim tasol Australia i no welkamim ol na karim ol i kam long PNG. PNG i kamap olsem

mama bilong ol bihainim wanbel bilong en wantaim Australia long 2013 na promis bilong en long givim lukaut na banis long ol refuji na asailum sika taim emi sainim Refuji Konvesen 1951 long 1984.

Rosa Koian i raitim