Nigel Akuani i raitim MANMERI i mas strongim Wisil Bloa Ekt, ol sumatin bilong Don Bosco Teknolojikal Institut long Mosbi i tok. Ol i tok dispela lo i kamap long banisim ol manmeri husat i tokaut long ol paul pasin i kamap long pablik samting olsem nogat bagarap i kamap taim ol i ripot.

Ol i tok bikos dispela lo i stap, manmeri i no ken tingting planti o pret

long ripot long paul pasin i kamap. Ol i mekim dispela tok long las wik long wanpela redio program em Komyunikesen na Yut Opis bilong Katolik Bisop Konprens bilong Papua Niugini i ogenaisim wantaim Nesenel Brodkasting Koporesen. Ol i tok taim ol paul pasin i kamap na nogat wanpela man o meri i ripot long dispela, kantri bai i no inap long lukim gutpela senis. Ol i tok planti kantri i save bungim hevi na sindaun i no save kamap gut taim manmeri i no ripot long ol pasin nogut. Egbert Awani, namba tri-yia sumatin husat i skul long Metal Febrikesen na Welding i tok taim bilong ripotim kain pasin em nau, i no tumora. Em i tok sapos yu no ripot yu bagarapim tasol sindaun bilong yu na bilong ol arapela. Em i tok ol papamama i gat wok tu long skulim ol pikinini bilong ol long gutpela velu na lo bilong sindaun gut wantaim ol arapela na komyuniti. Frederick Kembu, wanpela namba wan-yia Infomesen na Teknoloji sumatin i tok Wisil Bloa i gutpela lo na banisim gut ol manmeri. Em i tok wantaim kain lo, no gat wanpela bai i gat rait long bagarapim yu o ol samting bilong yu. “Bihain long kamap bilong dispela lo, taim yu no ripot, yu bai sapotim pasin korapsen na mekim kantri i go bagarap,” em i tok. Wayne Kasi, namba wan-yia Infomesen na Teknoloji sumatin i tok kamap bilong taim wanpela i ripot long ol pasin nogut i kamap, em i sapotim Wisil Bloa lo long lukim kantri i sindaun gut.