POLIS i holim pas tripela moa man long lus bilong K6 milien Manam Risetlemen Atoriti (MRA) mani long las wik na las wiken. Dispela tripela man em Madang Taun Meia (Mayor) wanpela distrik kot mejistret na pikinini bilong wanpela polis opisa.

Polis i holim pas Ishmael Yama bilong Mendikra husat i bilong Usino-Bundi distrik, Madang Provins. Ol i kisim dispela sas aninit long seksen 404(1) (a) long Kriminal Kod Ekt long kisim mani nating wantaim giaman tok. Polis i sasim em long asua bilong mani londering aninit long seksen 508 B (1) long Kriminal Kod (Amended) 2015. Mejistret Fredoline Kambibel bilong Ambunti Distrik, Is Sepik Provins em polis i sasim em aninit long seksen 132 (b) bilong Kriminal Kod Ekt long traim pasim gutpela kamap bilong kot long MRA mani i lus. Em i kisim sas tu aninit long seksen 136 bilong Kriminal Kot Ekt. Kennedy Etna, pikinini bilong polis opisa na i bilong TambulNebilyer, Westen Hailans em polis i sasim em aninit long seksen 404 (1) (a) bilong Kriminal Kod Ekt. Asisten Polis Komisina bilong Not Rijon, Peter Guiness i tok bikos long hevi bilong COVID-19 polis i askim dispela tripela man long mekim K2000 beil na stap ausait long polis rumgat long wetim kot. Pastaim long dispela em polis i bin holim pas Paul Amera husat i bin provinsal fainens menesa o tresera bilong Madang provins, pastaim Madang provinsal edministreta, Joseph Kunda Bonomanena na 7-pela moa arapela man i pas long kot bilong MRA mani. Guiness i tok polis i mekim wok painimaut yet na bai bringim moa ol manmeri.