RIPOT bilong Konstitusinel Lo Rifom Komisin (CLRC) bai wanpela long ol bikpela ajenda bilong palamen kibung long neks wik Tunde.

Dispela ripot i kamap bihainim inkwairi em CLRC i mekim taim em i raun long wan wan rijon long dispela yia long askim na kisim tingting bilong ol manmeri sapos i mas i gat senis long Mama Lo bilong kantri long kisim tok olsem PNG i Kristen Kantri. Long las mun CLRC i tokaut long givim dispela ripot i go long Palamen taim palamen i bung long neks wik na i go. Ol arapela bikpela toktok we bai kamap long dispela bung em ripot bilong mani long sik Coronavirus (COVID-19), apdeit bilong PNG Ilekotral Komonrol, 2022 Jeneral Ileksen na 2020 Nesenel Populesen na Hausing Senses. Apdeit bilong Ilekotral Komonrol na 2020 Nesenel Populesen na Hausing Senses bai tupela bikpela ajenda we ol Memba bilong Palamen bai tok pait long ol. Long dispela wik opis bilong Palamen Spika i bin salim wanpela pepa long toksave long ol Memba bilong Palamen olsem bai i gat palamen kibung i kamap long neks wik.

Las taim palamen i holim kibung em long 20 Epril. Palamen i no bin save holim ol kibung long klostu taim long dispela yia na dispela i mekim sampela opis na ol manmeri i no amamas olsem palamen i mas surukim ol de bilong kibung i go longpela taim bipo long em i ken holim narapela bung. Jeneral Seketeri bilong Katolik Bisop Konprens (CBC) bilong Papua Niugini na Solomon Ailan, Pater Giorgio Licini i tok kain pasin em palamen i sindaun sotpela taim na surukim de i go longpela taim bipo long em i kamapim narapela kibung i no stret. Em i tok dispela I ken mekim kantri i abrusim wok bilong sek na balens long wok bilong em. Em i tok sapos dispela kain sindaun i kamap, ol pipel i no inap save sapos gavman i ran gut o nogat. Aninit long Palamenteri Stending Oda, palamen i mas holim inap long 162 de bilong kibung long wanpela yia.