OL KRISTEN sios long Papua Niugini i tok egens long “Sorcery Accusation Related Violence” (SARV) o pasin bilong bagarapim laip na ol arapela samting long sut toktok bilong Sanguma.

Long soim bel hevi, ol i kamapim wanpela buk we ol i kolim strateji buk na i lonsim long sampela taim i go pinis i tok long yusim na sapotim gavman long daunim ol toktok na pasin nogut i pas long dispela sut tok. Dispela strateji i tok long kain mekimsave ol lain husat i save sutim tok long narapela na bagarapim laip bilong ol i mas kisim long em.

Dispela strateji buk nau ol i wok long yusim long wok isi long ol komyuniti long daunim ol hevi i pas long tok bilong sanguma. Presiden bilong PNG Sios Kaunsil, Pasto Roger Joseph i tok dispela strateji i kamap na bai stap olsem rot bilong sios i ken bihainim. Ol sios husat i sainim dispela strateji em Katolik, Luteran, Anglikan, Yunaitet, “Body of Christ” grup, Ivanjelikal Alaiens, Salvesen Ami, Baptis, Seven De Edventis (SDA), Nazarin na Gutnius Luteran. “Ol sios i bungi wantaim long luksave na kamapim ol rot kantri bilong yumi i ken gat gutpela sindaun na i no pas long kain kain hevi olsem toktok bilong sanguma,” Pasto Joseph i tok. “Wantaim grasia bilong God, mipela olgeta i ken painim gutpela laik bilong God, bel isi na gutpela sindaun. “Laik bilong man long God Papa, Pikinini na Holi Spirit i bikpela samting.” “Komyuniti bilong yumi i mas i gat bel isi bilong God i stap namel long ol na wok ol i mekim. “Wok bilong ol sios i bilong soim laik bilong God long olgeta lain manmeri.”