PNG Imigresen na Sitisensip Atoriti (PNGICA) long Sarere i go pinis i holimpas sampela papa bilong ol bisnis we i no bihainim ol lo bilong Papua Niugini.

PNGICA i bin luksave long dispela ol bisnis taim ol i mekim ol nomol sekap bilong ol long ol bisnis.

Long dispela taim ol i painim 8-pela bisnis i no bihainim lo bilong ol forena long stap long Papua Niugini.

Ol i painim olsem tupela e mol refuji na PNGICA i putim ol long han bilong Ogenaisesen bilong Maigresen (IOM) na narapela sikispela ol i putim ol long Bomana Imigresen Senta na bai ol i mekim moa wok painimaut.

Sif Maigresen Opisa long PNGICA Stanis Hulahau i tok ol forena husat i kam mekim bisnis long PNG i mas rispektim ol lo bilong kantri taim ol i stap.

“Mi laik tok klia olsem ol foren nesenel i welkam oltaim long mekim bisnis long PNG tasol ol i mas bihainim ol lo. Ol i mas gat visa long stap long kantri aninit long lo,” Mista Hulahau i tok.

PNGICA i wok long givim ol visa long ol foren nesenel bihainim ol aplikesen i kam long fomol proses long strongim foren invesmen, kirapim wok bisnis, kamapim moa wok na serim ol skil long dispela taim bilong pandemic.

“Tasol mi was tu long ol nesenel sekyuriti isu long ol sampela bisnis we ol foren nesenel i ranim we i no gutpela long kantri,” Mista Hulahau i tok.

Mista Hulahau i tokaut tu olsem taim e mi kisim opis olsem Sif Maigresen Opisa na bikos long COVID-19 em i givim daireksen long opis bilong em i ken givim aut ol visa bilong ol foren nesenel long PNG yet. Na tu e mi givim taim inap tripela mun long olgeta husat visa bilong ol i pinis long go na stretim wantaim opis bilong em. Astingting bilong dispela em long mekim isi long ol lain i ken stap na mekim bisnis.

Tasol i no olgeta kampani na foren nesenel i bihainim dispela tok na yusim dispela tripela mun long stretim ol visa na wok pemit bilong ol.

Spot sekap long Sarere i soim dispela pasin bilong i no bihainim lo i wok long kamap bikpela.

Mista Hulahau i singaut gen long ol foren nesenel long go hariap na lukim ol opisa bilong em na stretim ol wok na visa pepa bilong ol.

PNGICA bai i go het yet long mekim ol spot sekap long Nesenel Kapitel Distrik na ol arapela provins tu.