INTERNAL Revenue Commission (IRC) Komisina Sam Koim i singaut long ol pipel long helpim long rausim korapsen insait long Papua Niugini.

Em i tok insait long wanpela stetmen bilong em long midia olsem, “Yu ken helpim long daunim korapsen sapos yu ripotim ol lain i bagarapim ol sevis na laikim ol feiva long mekim wok long givim sevis long yu.” Planti pipel i save dipen long gavman sevis tasol sampela taim ol sevis i save isi tru long wanem ol pipel husat i stap long ples bilong helpim i save laikim sampela feiva pastaim na bihain ol i ken mekim wok.

Mista Koim i tok em i bilip korapsen em i kamap bikpela long PNG bikos ol pipel i was gut long dispela pasin na i groim. Nogat wanpela man o meri i kamap long graun wantaim pasin bilong korapsen. Em i tok taim taim wanpela man o meri i grisim wanpela gavman opisa wantaim lans mani long mekim wok bilong em we gavman i baim ol pinis long mekim wok, dispela man o meri i planim sid bilong korapsen nau. I no longtaim na sid ya bai i gro na givim strong long dispela ol opisa long laikim feiva pastaim na bihain ol i ken mekim wok. Mista Koim i tok long dispela pasin yu helpim long statim opisa

ya long bihainim wanpela laipstail we potnait pe bilong em yet i no inap sapotim. I go i go na opisa bai i askim long moa mani long wanem em i pilim swit pinis long kisim mani long sait. Long wankain taim ol arapela wanwok i stap lukluk long opisa husat i kisim braib lans mani na ol i ting ol i misaut long sampela samting. Na ol i lukim tu sans i stap long pes bilong ol na ol i stat bihainim pasin bilong wanwok opisa. Moa yet bikos ol lain i save givim braib lans mani i wok long kisim sevis hariap olgeta arapela pipel i mas wet longpela taim long kisim sevis. Dispela pasin bilong wet long

kisim sevis i save pusim moa pipel long joinim lain bilong givim braib o gris mani. Na pasin bilong braib i kamap strong na bikpela na dispela wil bilong pablik sevis i no inap ran inap yu givim ol gris mani. Mista Koim i tok olsem no ken tru peim mani long braibim gavman opisa. Ol i kisim pe pinis long mekim dispela wok. “Sapos yu wanpela husat i save peim ol gavman opisa long mekim sevis bilong yu, yu mas stop. Sapos yu wok long peim ol opisa bilong IRC, plis stopim dispela pasin,” Mista Koim i tok. Yumi mas helpim long rausim korapsen.