SPESOL Palamen komiti bilong Jenda Beis Vailens (GBV) i mekim wanpela muv long tokaut long nesenel na lokol level long wok bilong ol long pait agensim GBV.

Ol i redi long givim ripot long Ogas sesen bilong Palamen bung wantaim strongpela edvais bilong kisim eksen long katim daun GBV long kantri long helpim ol lain i wok long kisim birua. Namba wan taim komiti i kisim tingting bilong pablik long wanpela wok risets bilong ol em long 24 na 25 Me 2021, we ol minista na opisal i bin bekim sampela askim bilong ol pablik long wok gavman i mekim long helpim GBV. Siaman bilong komiti Charles Abel i tok pablik i bin sapotim strong dispela tingting. Ol i harim namba wan taim olsem pablik i bin luksave long wok ol gavman lida i mekim wanem samting i bin kamap na wanem samting ol i no bin wokim long helpim ol pipel i save bungim hevi bilong GBV. Em i tok mipela i no amamas olsem wok bilong daunim nesenel GBV i no kamap

strong. GBV i nidim moa mani long strongim wok bilong ol ogenaisesen olsem polis, helt sevis na kot long mekim wok bilong ol. Nesenel GBV sekreteriet mas kamap, ol woka na risos long kodinetim GBV helpim wok insait long kantri. Komiti i harim wanem samting i save kamap na ol i invaitim ol pablik long raitim sabmisen long ol komiti. Sabmisen i bin pas long Jun 30 na long dispela taim 34 sabmisen ol komiti i bin kisim long ol wan wan pipel na ol ogenaisesen insait long kantri wantaim planti ol isu na Tems ov Referens sabmisen nau pablik ken lukim long intanet. Wanpela miting bilong komiti bin kamap long Julai 6 long wanbel long narapela muv. NCD Gavana Powes Parkop husat em i memba bilong komiti i mekim wanpela ripot bek olsem bipo long Ogas sesen bilong Nesenel Palamen bai ol i stretim olgeta ripot. “Mipela laikim klia luksave bilong ol step na eksen insait ripot mas karim kaikai kwiktaim na dispela bai soim olsem mipela inap mekim senis long daunim dispela hevi bilong GBV long sotpela taim tasol,” em i tok.

Joseph Dawai i raitim