NESENEL Plening Dipatmen i bin holim konprens bilong ol provinsal, distrik, LLG na wod plena long Pot
Mosbi.

Dispela konprens i ran long wanpela wik we i bungim ol patisipen bilong ol 22 provins bilong PNG
na ol ripresentetiv bilong ol praivet sekta, gavman dipatmen, distrik divelopmen atoriti na ol provinsal
edministreta. Plening em i impoten samting tru long wok bilong gavman long lukim driman na ol wok i
kamap tru.Long lukim divelopmen long ol provins, distrik, LLG na wod, i mas gat gutpela plen we ol plena
i mas kamap wantaim bilong sabmitim i go long ol Nesenel Plening bilong kisim tok orait long fanding.
Long taim PNG i bin kisim independens, gavman i save kamapim ol divelopmen plen bilong karimaut
long lukim kantri i go antap long narapela level. Na planti bilong ol dispela plen i kamap tru tasol i laikim
moa helpim bilong impruvim na kisim driman bilong 2050. Long kisim bek kantri PNG, olgeta pipel i mas
kontribiut i go insait long divelopmen plen
bilong dispela driman. Long dispela astingting tasol, Nesenel plening i bin holim dispela konprens bilong
kism tingting bilong olgeta patisipen long kontribiut i go long divelopmen plen bilong 2050. Long dispela
konprens, ol patisipen bai klia gut long lo na ekspektesen bilong Nesenel Plening long taim bilong
sabmitim ol provinsal plen. Tasol long dispela taim tu, yumi lukim olsem planti plen i no save kamap tru
bikos i gat sampela samting i pasim rot bilong ol. Edvaisa na Polisi na Plening opisa bilong Sauten Hailans
Provinsal gavman i tok, “Planti plen i no save kamap tru bikos PNG i gat planti plen tumas. Yumi raitim
planti plen tasol yumi no karimaut ol dispela plen, tasol yumi go het yet long raitim plen. Wanem rot
bilong stretim dispela hevi?” Tasol man i bin makim Praim Minista na Minista bilong Plening, Dokta
Kobby Bomareo i tok “mi gat bikpela bilip olsem yumi ken kisim driman bilong 2050 sapos yumi wok
wantaim na save long wanem samting yumi mas mekim long wan wan fil bilong yumi.”

Carolyne Ketsimur i raitim