WANPELA edvokesi na kolisen bilding woksap bilong ol meri long Momase i bin kamap long Madang long
wik i go pinis. Dispela tripela-de bung i pinis wantaim ol rekomendesen bilong ol meri long ol risev sia i
long Dipatmen bilong Komyuniti Divelopmen na Rilijen.

Ol meri i bin kam long olgeta rijon na serim ol
hop bilong ol na kamap wantaim ol strateji bilong sapotim ol meri long patisipet long politik long kantri.
Namel long ol wanpela lidameri long Morobe, Mis Finkewe Zurenuoc. Mis Zurenuoc i tok, dispela
woksap i helpim ol long go long longpela hap na em i bilip planti moa meri bai i go insait long palamen.
Em i amamas tu olsem em i stap insait long Momase kolisen. Narapela meri em Carol Mayo bilong Wes
Sepik Provins. Mis Mayo i tok olsem dispela woksap i bringim yuniti namel long ol meri.
“Mi ken lukim kopresen bai i kamap long wanem mipela i lainim planti samting tru. Mipela i bildim planti
rilesensip wantaim ol meri husat i laik resis long ileksen,” Mis Mayo i tok. Nau long dispela taim i nogat
wanpela meri insait long nesenel palamen. UN Women i helpim long fesilitetim dispela ol woksap long
redim ol meri long 2022 nesenel jeneral ileksen.