ATONOMUS Bogenvil Gavman i welkamim tingting bilong Rio Tinto na Bougainville Copper Limited (BCL)
long stretim ol legesi hevi bilong ol long Panguna Main.

Presiden Ishmael Toroama i tok gavman bilong
em i amamas olsem Rio Tinto na BCL i pilim bel kirap long stretim ol hevi na bagarap ol i bin kamapim.
Maski planti benefit long sait bilong mani, Rio Tinto na BCL i bin feil long adresim ol hevi na bagarap we
ol i kamapim long envairomen na rausim ol asples long ples bilong ol. Dispela i bin kamapim bel hevi
namel long ol pipel bilong Bogenvil na kampani na Nesenel Gavman tu. Dispela ol hevi i stap longpela
taim tru na i bin kamap wanpela bikpela as bilong bikpela sivil woa we i bin kamap long Bogenvil. Long
las 30 yia i kam, stat long
taim maining operesen i pas ol bikpela bagarap long envairomen insait long Spesel Maining Lis na Lowa
Tailings i stap yet. Dispela envairomen asesmen bai i lukluk gut long olgeta bagarap we i kampani i bin
kamapim na i stap yet long dispela taim. Panguna Main i bin stap wanpela yet na i risponsibel long
benkrolim independens bilong Papua Niugini na provaidim ikonomik bes bilong dispela nupela kantri
long 1973 i go inap 1989. Mista Toroama i tok, “Mi luksave long ol Human Rights Law Center long givim
gaidens long lo na helpim long bringim ol komplen bilong mipela bihainim fomol proses i go long
Organization for Economic Corporation na Development. “Mi luksave tu long Australia National Contact
Point long
fesilitetim ol toktok i go i kam we i bringim mipela i kam kamap long dispela mak nau. “Mi mas tok
tenkyu long Minista bilong Edukesen long ABG na memba bilong Ioro Misis Theonila Matbob long go het
long karim dispela ol toktok makim ol pipel. “Bikos long Theonila husat i wok hat long toktok na karim
dispela tingting we i bringim mipela long kamap long wanpela solusen namel long mipela na Rio Tinto na
BCL,” Toroama i tok. Em i tok, “Mi laik tok olsem ol toktok bilong gavman long givim ol konsesen long
Panguna em i no tru. “Panguna main bai i stap pas inap olgeta autstending hevi i stret. “Namba wan
ajenda bilong gavman bilong mi em long divelopim Bogenvil na redim ol pipel bilong mipela long
Independens,” em i tok.