PAPUA Niugini i sot tru long ol helt wok manmeri. Menesa bilong Polisi na Plening long Nesenel Helt
Dipatment Agnes Pawiong i mekim dispela tok long Tunde long enuel plening bung bilong Nesenel
Plening
Dipatment.

Mis Pawiong i tok namba bilong ol helt wok manmeri olsem dokta na nes i no planti long
kantri i no planti moa. Pastaim i bin i gat planti wok manmeri tasol nau nogat. “Long 2010 mipela i bin
gat 18, 000 helt wok manmeri tasol nau namba i go daun long 11,000. Dispela namba em i no inap
long helpim ol sik pipel long kantri,” em i tok. Pot Mosbi Intenesenal Haus Sik (PIH) i bin askim long 7,000
nes long wok wantaim ol tasol dispela namba i bin bikpela tru. Ol i kisim 3,000 nes insait long kantri na
narapela 4,000 ol i kisim long ol narapela kantri olsem Filipins.
Mis Pawiong i tok, “Dispela i soim olsem mipela i nogat inap wok manmeri bilong helpim ol sikmanmeri
na pikinini bilong yumi. Ol provinsal helt dipatmen i stap aninit long ol provinsal gavman na i no nesenel
dipatmen bilong helt.”
Mis Pawiong i tok moa tu olsem insait long las 10 krismas ol i no opim wanpela nupela etpos insait long
kantri. Mani mak bilong mekim wok bilong helt dipatmen tu em i go daun na ol sik olsem kensa i wok
long go bikpela.
Em i tok mipela i mas lukautim mipela yet long stap gut na i no ken kisim ol kain sik. Mipela i mas apim
namba bilong ol helt wok manmeri bilong mipela.