KATOLIK Bisop Konprens (CBC) PNG na Solomon Ailan i singaut long Australia gavman long hariap na stretim ol 127 asailum sika na refuji husat i wet yet long go wanpela kantri na sindaun gut.

Jeneral Sekretari bilong CBC Pater Giorgio Licini i tok tude Mande 18 Julai i makim 8-pela yia nau taim Australia palamen i mekim disisen long holim ol asailum sika long ol arapela ples ausait long Australia.

Em i tok long 19 Julai 2013 ol asailum sika i bin go long Australia long bot tasol Australia i no larim ol i go sua na em i karim ol i go long Manus na Nauru.

Na sampela husat i stap long Australia o long ol arapela kantri i stap long inapim interes bilong Australia tasol.

Ol lain i stap long kalabus i helpim Australia i win long astingting bilong en long stopim ol bot long go moa long Australia.

Pater Giorgio i tok tru olsem dispela polisi bilong Australia long holim ol asailum sika na refuji i stap long kalabus longpela taim na i nogat kot long ol em i no stret.

“Mipela i bilip strong olsem dispela pasin i no ken kamap long ol lain husat i mekim bikpela sakrifais long helpim interes bilong Australia,” Pater Giorgio i tok.

Mipela i sanap wantaim Nauru long dispela de 19 Julai na tok strong long Australia gavman long senisim lo bilong en na givim fridom na ples bilong stap ol lain husat Istap long Manus na Australia na i no gat narapela ples long go.

“Mipela i save olsem ol asailum sika na refuji long PNG i stap gut moa long ol lain i stap long Australia, tasol yumi no inap holim ol i stap hia olgeta,” em i tok.

Aninit long polisi bilong Australia ol i nogat rait long stap long Australia na ol i nogat duti tu long stap long Papua Niugini sapos ol i no laik stap hia.

Australia i laikim ol i mas stap olgeta long Papua Niugini em i egensim spirit bilong self-diteminesen.

Mipela i laik lukim Australia i rausim olgeta koloniel pasin bilong en na kamapim nupela stail bilong pasin sori na lidasip bilong wokbung wantaim long Pasifik.

Em i longpela taim tumas ol i wet long go long narapela kantri na sindaun gut na olgeta husat i mekim wok long lukautim ol tu i sotwin pinis.

Long Nauru nau yet 108 asailum sika na refuji i wet yet i stap.