Tumora em namba 40 Remembrens De bilong tingim ol lain man husat i pait long taim bilong Wol Woa II (1942-45).

Gavman i makim tu tumora olsem Pablik Holide. Seremoni bai stat long 8 klok na pinis long 12 klok.

Gavman i holim dispela de long tingim ol lain bilong yumi husat sapos ol i ami opisa, keria (carrier) o ol medikal opisa, ol kuk boi i bin sanap wantaim ol alied fos ( Australia, Nu Silan na Amerika) o Japan na pait long Wol Woa II.

Spika bilong Palamen, Job Pomat bai go pas olsem ekting Gavana Jeneral long Remembrens De seremoni long Memorial Pak, Ela Bis.

Em i kisim ples bilong Gavana Jeneral Sir Bob Dadae.

Wantok Niuspepa i no inap kisim tok long Opis bilong Gavana Jeneral long Gavman Haus long as em i no inap kamap.

Mein ges bilong dispela seremoni em Gavana bilong Nesenel Kapital Distrik Powes Parkop.

Seremoni bilong tumora bai go wantaim het tok, “Their Legacy, Our Inspiration”, minim presen bilong ol, amamas bilong mipela o em i ken min tu olsem long hatwok bilong ol, mipela i stap amamas.

Long toktok bilong em, i gat bilip olsem Mista Pomat bai tokim yumi tu long tingim hatwok na sakrifais ol papamama na ol sekyuriti opisa i bin mekim.

Em bai tokim yumi olsem bikos long sakrifais na hatwok bilong ol tumbuna bilong yumi, yumi i no ken lus tingting long ol

I gat bilip em bai yusim dispela de long tok moa long yuniti bilong kantri olsem yumi mas sanap strong olsem wanpela kantri, wanpela pipel na wanpela nesen.

Spika Pomat bai toktok tu long hevi bilong coronavirus (COVID-19) na ol salens em i bringim.

Hevi bilong COVID-19 i no hevi bilong helt tasol i bilong olgeta samting i pas long laip, olsem ikonomi, edukesen na sosel.

Maski long dispela ol salens i gat planti manmeri bai kamap long dispela de we bai lukim sampela em bai ol Memba bilong Palamen, mausman bilong ol kantri, ol sios lida na wan wan ogenaisesen.

Namel long ol nogut ol bai lukim tu sampela ol “Fuzzi Wuzzy Angel”, ol lain husat i pait na helpim ol alaid ami long taim bilong woa.