RIPOT i kamap long dispela wik Helt Minista bilong Atonomus Bogenvil Gavman (ABG), Charry Jerry Napto wantaim 6-pela arapela lain i bungim hevi long solwara namel long Buka na Nissan Ailan.

Ripot i tok tupela balus nau i stap pinis long skai long painim ol lain husat i bungim dispela hevi long solwara long las wik Sarere.

Dispela tupela balus em SAR balus long Cairns, Australia na Manalos Aviation balus long Lae, Morobe Provins.

Wanpela man tasol ol i kisim na i stap long Buka Jeneral Haus sik em pikinini man bilong Mista Napto, Keith.

Ripot i tok stap Keith nau i wok long kamap gut.

ABG i putim wanpela toksave olsem Napto wantaim 6-pela arapela lain i ran long bot long Buka na i wok long go long Nissan Ailan taim ol i bungim hevi.

Ripot i tok Disasta opis bilong ABG nau i wok wantaim PNG Maritaim na Kodinesen Senta, na SAR Plan long kamapim ol “search na rescue” wok long painim ol lain husat i lus long bot.

ABG i salim wanpela toksave long pablik olsem wantaim rispek long famili bilong ol lain husat i lus long bot, opis i no laik bai kain kain ripot o tok i mas kamap long seifti bilong dispela ol lain husat i lus.

Em i tok olgeta pablik tok long stap bilong displea ol lain i mas kam long opis bilong ol.

Opis i askim pablik long tingim dispela ol lain long prea bilong ol.

Ripot long sosel midia i tok bot i kapsait 300 mita longwe long Nissan Ailan.

Bot i kapsait long hevi bilong bikpela solwara.