GAVMAN bai i makim ol viles kaunsil long rekotim nem bilong ol pipel long wan wan wod bilong ol bihain long nesenel populesen na hausing sensus i suruk i go long 2024.

Praim Minista James Marape i tok Nesenel Stetistikel Opis i no inap karimaut sensus tasol bai ol wod kaunsila i kauntim het bilong ol pipel long ol viles.

“Mipela bai givim K5000 na rekot buk long wan wan wod kaunsil long statim dispela wok na bihain bai gavman i givim narapela K5,000 long pinisim wok bilong kauntim ol pipel,” Mista Marape i tok.

Olsem long pinis bilong mun Julai, Ogas na Septemba wok bilong kauntim ol man na meri bai i stat.

Praim Minista Marape i tok, “long mun Oktoba, Novemba na Disemba ol bai i sekim ol nem na dispela bai ol yusim tu long Biometrik sistem.”

Em i tok dispela wok em i isi na i no inap westim mani long karimaut ol ekspensiv sensus o wok bilong kauntim man.

“Mi mas wokim dispela wok i kamap bikos mi no laikim planti toktok i kamap long sait bilong komon rol,” Mista Marape i tok.

Mista Marape i singaut long olgeta pipel long givim nem bilong yupela long ol kaunsil long komyuniti bilong yupela long wanem nem bilong yupela bai i stap long lista bilong vot long nesenel ileksen long 2022.

Charlpetson Koi i raitim