WOK bilong kauntim ol pipel husat bai i vot na apdetim ilektorel rol i mas kamap.

Dairekta bilong Institute bilong National Affairs Paul  Barker i tok, taim ol i kaunim ol manmeri pastaim long taim bilong vot em i save mekim isi long luksave long namba bilong manmeri long bihaintaim.

Mista Barker i tok, “Na tu taim ol stetistisen i kaunim ol manmeri ol i save long baundri bilong ol liklik komyuniti na hauslain. Ol wok manmeri bilong kauntim ol pipel inap long mekim ol kain wok.”

“Ol i save long hamas namba bilong manmeri ol i nidim long mekim wanpela distrik. I gat sampela kain ol pasin long kamapim ol distrik i stap tasol nogat kain senis i kamap stat long 1975 i kam inap nau,” Mista Barker i tok.

Em  i tok tu olsem, namba bilong manmeri i go bikpela pinis. Sampela bilong ol komyuniti na distrik i gat bikpela namba manmeri olsem ol taun na siti na ol sampela hap i gat liklik namba manmeri. Tasol nogat senis i kamap na namba bilong ol memba bilong palamen em i stap olsem bipo em i stap long en.

“Ol stetistisen i mas kisim namba bilong ol manmeri long luksave long ol kain hevi. Politik i mas no ken stap insait long taim bilong kaunim ol manmeri na tu ol i mas mekim bipo long ileksen i kamap. Na ol i mas no ken mekim hariap tru na i no kaunim olpipel gut,” Mista Barker i tok.

“Mipela i go klostu long taim bilong ileksen na i nogat inap taim long mekim wok bilong kaunim ol pipel. Sapos ol stetistisen i laik mekim wok bilong kaunim ol pipel hariap ol i bai nidim planti mani na kar na bilas.

Ol stetistisen i mas no ken stap insait long politik na mekim dispela wok ol i mas stap ol yet na wok,” Mista Barker i tok.

Taim bilong 2022 Nesenel Jeneral Ileksen i kam klostu pinis na wok bilong apdetim Ilektorel rol i no stat yet.

Samantha Solomon i raitim