WANPELA asailum sika i smail na holim tripela paspot na soim Sista Mary McCarthy taim Sista i go lukim em na famili bilong em.

Man ya em bilong Egypt na meri bilong em meri Papua Niugini na tupela i gat wanpela bebi.

Dispela man i save kuk nais tru na taim Sista Mary i go lukim ol, man ya i kuk na ol i sindaun long pasin bilong ol Muslim na kaikai. Man ya em  Muslim.

Sista Mary i mekim dispela ol stori taim Katolik Bisop Konprens I holim konprens bilong ol midia long Mande dispela wik na tokaut long hevi bilong ol asailum sika na refuji long Papua Niugini. 

Em i save harim na kaunselim ol asailum sika long Pot Mosbi.

Em i tok ol i nogat rong tasol taim ol i stap olsem kalabus ol i save pilim o kisim kain kain hevi long tingting na bodi.

Dispela man Egypt em i amamas em i kisim paspot pinis na em na meri na pikinini bai i go sindaun long wanpela narapela kantri.

Tasol planti moa i stap yet long PNG.

Sista Mary i save wok olsem Katolik Seplin long Pot Mosbi Jeneral Haus Sik tu.

Em i tok long dispela hap em i save stori wantaim ol asailum sika na refuji tu taim ol i sik na kam stap long ol wod.

Wanpela taim ol nes i tokim em long go lukim wanpela man long wod bilong ol lain i gat sik long het (mental illness). Pastaim long em i go ol i tokim em olsem dispela man em i wanpela hatpela man tru long helpim.

Tasol Sista Mary i givim sampela taim long sindaun tasol wantaim dispela man na bihaintaim man ya i lusim haus sik em i tingim sista. Sampela taim bihain na isi isi dispela man i senis na i stat opim ai bilong em na lukluk long Sista Mary.

Narapela asailum sika em i stap long Paradise Intenesenel Haus Sik. Dispela man i straik na i tambu long kaikai long planti de na dispela i mekim em i sik.

Bihain taim em i pinis long haus sik na kam ausait em i bin amamas olsem dispela misinari sista i go visitim em na harim wari bilong em na dispela i bin helpim em na nau em i orait gen.

Rosa Koian i raitim