Wanpela saspek bilong Soseri Akyusesen Riletet Vailens  (SARV) we i bin kamap i no long taim i go pinis long wanpela liklik seven krismas pikinini meri, Angela Andrew, long Westen Hailans Provins bai sanap long kot long dispela wik.

Dispela saspek em i step mama bilong dispela pikinini meri yet.

Angela i bin kisim bikpela bagarap long bodi bilong en bihain long step mama bilong en i paitim, abyusim em na givim kainkain skin pen long en long 7-pela haua. Em i sutim em wantaim naip, kukim em wantaim hatpela aiyon, brukim bun bilong en na paitim em. Tupela lek bilong en na wanpela han bilong en i bruk.

Step mama bilong Angela i mekim dispela pasin long Angela bikos em i tok Angela i sanguma.

Dairekta bilong Divelopmen long PNG Tribal Foundation Ruth Kisam i tok Angela i nau kisim helpim long Mt Hagen Jeneral Haus sik na step mama bilong en husat i abyusim em na bagarapim em i nau stap long Mt Hagen Polis sel.

Mama husat i karim Angela i givim Angela i go long bikpela kasen susa bilong en taim em i laik i go maritim narapela man. Na dispela kasen susa bilong mama bilong Angela i givim Angela i go long pikinini meri bilong en long kisim na lukautim.

Ol dokta i saspek olsem ol bagarap i kamap long bodi bilong Angela i bikpela tru na i no nau tasol i kamap. Ol i tok dispela step mama bilong Angela i abyusim Angela long moa long tupela krismas.

Long wankain taim, Gary Bustin, Faunda bilong Tribal Foundation i tok bai ol i wok bung wantaim gavman long kamapim lo bilong mekim save long ol glas man o ol lain husat i save lukim na skelim ol sanguma na posin man.