PNG POWER LTD (PPL) na PNG Difens Fos (PNGDF) i sainim wanpela Memonrendum of Understanding (MoU) bilong ol operesen na mentenens bilong Lombrum Naval Beis Pawa Plent long Manus Provins.

Dispela i kamap aninit long PNGDF Lombrum Naval Beis Infrastraksa Projek.

Wankain olsem PNGDF, PPL i lukim gutpela bilong Lombrum Naval Beis Infrastraksa Apgred Projek na i pilim olsem em i bikpela samting long operesen bilong ol PNGDF.

Na tu ol i luksave olsem long pinisim gut dispela projek, PNGDF i mas givim ol operesen na mentenens bilong pawa plent na ol infrastraksa i stap yet i go long han bilong PPL.

Dispela MoU i tokaut long wan wan wokmak bilong tupela sait wantaim long apim mak bilong wokbung long strongim patnasip na pinisim gut dispela operesen bilong pawa plent na tu givim sapot long karimaut Lombrum Naval Beis infrastraksa apgred projek.

PPL i bin stap insait long taim bilong toktok na mekim plen long kamapim Lombrum infrastraksa Projek na tu kamapim ol plen bilong rausim pawa plent we i stap na kamapim gen nupela pawa plent.

Dispela MoU bai lukim ol wokmak bilong operesen na mentenens bilong Lombrum Pawa Plent na ol infrastraksa i stap long han bilong PNGDF bai nau i go long PPL.