OL LIDA man bilong Kumuka Nganj Kapangkup (KNK) traib long Jiwaka i givim 8-pela saspek i go long ol polis long Sarere Julai 17, 2021.

Ol dispela saspek em ol yangpela man tasol, we polis i bilip i bin bagarapim Banz polis stesin. Ol i bin paitim wanpela polis meri, rausim ol 15 lain long rum gat i go fri, tromoi ston long haus bilong ol polis,stilim wanpela pistol na bagarapim kompyuta bilong stesin komanda James Rumi. Dispela ol samting i kamap long Julai 2 bihain long polis i sutim wanpela yangpela man KNK husat i bin dring spak na bikhet long Banz maket.

Provinsal Polis komanda (PPC) Gideon Kauke i tok tenkyu long ol lida long mekim gutpela pasin long givim ol saspek i kam long han bilong lo.

"Dispela kain pasin mipela i no save lukim long Jiwaka bipo.

"Mi tok tenkyu long yupela ol KNK long rispektim lo. Lo yet bai skelim asua i stap wantaim husat," Mista Kauke i mekim dispela tok taim em i toktok long ol lida, mejistret, na polis long Minj polis stesin.

KNK Gutpela Sindaun siaman Peter Bani i tokaut olsem yangpela man polis i sutim i bin dai 5-pela de bihain long dokta i katim lek bilong en long Mt. Hagen Jeneral Haus sik bikos  em i lusim planti blut.

"Sapos Mond Paki i no bin kisim bikpela bagarap, ol mangi i no inap long bagarapim stesin.

"Tasol bagarap i kamap pinis na mipela i sori tru.

"Mipela i rispektim lo na larim ol polis investigeta mas karim wok painimaut," Mista Bani i tok.

Mista Kauke i tok ol saspek bai i baim beil na kam ausait long wetim kot na dispela polis man husat i sutim Mond Paki bai go long sel tu.

"Banz maket i bin pas longpela taim liklik. Em i no gutpela. Yumi mas larim ol pipel i wokim bisnis gen.

"Bihain polis wantaim ol KNK yet bai sekan na stretim dispela hevi long ples kastom na kamapim bel isi," Mista Kauke i tok moa.

KNK lida na bisnisman Andrew Tants i tokaut olsem ol i bai lukluk long stretim ol bagarap we ol yut i bin mekim long polis stesin na long haus bilong ol polis famili.

Yangpela lida bilong KNK Martin Kasbal i autim bel hevi bilong ol manmeri bilong KNK olsem hevi i no inap kamap sapos ol polis i harim tok bilong foma Isten End Divisen Komanda ACP  Nema Mondiai long ol polis i no ken sutim ol sivilien wantaim gan.

"Dispela em namba tu taim polis i sutim na kilim i dai wanpela man KNK wantaim gan.

"Long 2018 polis i sutim na kilim wanpela yangpela boi bilong mipela we i bin wanpela sumatin long Wagi Veli Sekenderi Skul na Mondiai i tok klia long ol pablik bilong Jiwaka olsem bihaintaim ol polis mas no ken yusim gan long ol sivilien long Banz o long ol narapela hap insait long Jiwaka.

"Tasol nau yumi ken lukim olsem ol polis i sakim tok bilong ol lida bilong ol na sutim i dai yangpela man na i brukim lewa bilong mipela stret.

"Mipela i laikim olsem wokpainim mas go yet. Wanpela spesel na independen investigesen tim mas karimaut wok painimaut long husat tru i asua.

"Ol polis i wokim planti toktok long midia na i no givim sans long mipela i ken givim stori bilong mipela," Mista Kasbal i tok.

Ol polis i bin tok olsem Mond Paki i bin holim naip na atekim ol polis na putim laip bilong ol polis na pablik long birua olsem na polis i no bin gat tupela tingting na ol i sutim em long lek.

Tasol ol lain KNK i bilip yet olsem Mond Paki i bin traim long ranawe long polis taim ol i sutim em  long lek bilong em.

HOFFMAN GULGARYE i raitim