FAINEL ripot wantaim rekomendesen long wokpainim we i kamap long tokaut long PNG i Kristen Kantri insait long mama lo bai go long Palamen long dispela mun Julai long putim long tebol bilong Palamen long mun Ogas.

Ol komisina bilong Konstitusenel Lo Rifom Komisin (CLRC) i givim tok orait long dispela fainel ripot insait long namba tu kwata kibung bilong ol CLRC komisina long las wik Fonde. Dispela fainel ripot i gat tupela hap bilong en.

Seketeri bilong CLRC Dokta Mange Matui i tok no gat wanpela ripot i save i go long han bilong gavman inap ol CLRC Komisina i givim tok orait.

Em i tok dispela ripot na wokpainim insait long kantri i kamap insait long sikispela wik tasol maski liklik mani ol i givim na ol salens bilong COVID-19 inap long stopim ol. Em i tok ol arapela nomol wokpainim i save kamap insait long 18 mun i go inap 2-pela krismas tasol dispela wokpainim na ripot wantaim i kamap insait long sikispela wik maski tupela bikpela salens tu i bin stap.

Siaman bilong CLRC Kevin Isifu i tok tenkyu long Seketeri Dokta Mange Matui, Deputi Seketeri Dorothy Mimiko-Kesenga, ol dairekta na wokmanmeri bilong Komisin long kamapim dispela ripot bilong Gavman na ol pipel bilong PNG.