LAS wik long wanpela wan-de trening bilong ol nius manmeri long Lae Siti i bin kamap.

Ol nius manmeri i kam long Post Courier, The National, Wantok Niuspepa na EMTV.  

Julie Badui Owa bilong EMTV Lae opis I bin go pas long dispela trening.

Dispela em i namba wan taim wanpela kain trening i bin na em i kamap gut long luksave bilong ol Lae media tim.

Long helpim ol nius manmeri i klia gut ol risos lain tu makim disabiliti komyuniti na ol famili tu i bin stap.

Insait long trening ol nius manmeri i toktok long pasin bilong kisim na givim stretpela nius long sik COVID-19.

COVID-19 i bagarapim planti pipel long wol na PNG tu na em i gutpela ol nius manmeri givim ol stori bilong helpim ol pipel na no ken mekim stori bilong mekim ol pipel i pret na paul nabaut.

Long dispela trening ol nius manmeri I toktok tu long moa awenes i mas kamap long dispela sik, long helpim ol pipel long klia gut long ol COVID-19 protokol na bihainim ‘nupela pasin’.

Awenes bilong werim mask, wasim han wantaim sop na klin wara i mas go long ol komyuniti.

Olgeta husat i kamap long dispela trening i amamas tru long dispela sans bilong toktok na lainim.

Wankain trening i bin kamap long Pot Mosbi wantaim ol arapela nius haus.

Paulus Tali i raitim