WANTAIM 8 mun tasol bilong 2022 Nesenel Jeneral Ileksen Ekting Elektoral Komisina Simon Sinai i nidim K70 milien long statim enrolmen eksesais.

Dispela enrolmen eksesais bai i gat baio-metrik voting sistem bai stat long 2022 Nesenel Jeneral Ileksen.

Komisina Sinai i tok komisen i plen olsem K426, 000 milien bai inap ranim 2022 Nesenel Ileksen na mani mak olsem K70 milien inap karimaut enrolmen eksesais.

Em i tok plen i stap pinis long ol 331 LLG na 89 ilektoret insait long kantri.

Tasol komisen i no kisim mani yet long gavman.

Komisina Sinai i tok 8 mun em inap stret long Ilektoral Komisen long redi long komen rol ap de pastaim long Jeneral Ileksen.

“Mi gat olgeta plen pinis long rot bai Komisen i wok long pepa wok na operesen tu,” em i tok.

“Mipela olsem komisen mipela i redi wantaim operesen plen na mipela i wet tasol long mani na taim mani i kam long mipela bai mipela stat.

“Long sekyuriti, mipela redim pinis na toktok wantaim polis na dispela plen i stap pinis wantaim ol na sapos mipela i redi bai ol polis i kam helpim Komisen long rolimaut program bilong ileksen.

“Taim gavman i givim mani bai komisen i stat long ilektoret rolaut wok na go aut trenim ol lain i ken helpim ol long taim bilong poling,” Sinai i tok.

Long givim Writs long 2022 Jeneral Ileksen bai kamap long 24 Epril, 2022.

Joseph Dawai i raitim