COVID-19 i bringim wanpela vaires we i kamapim planti bagarap na indai long wol olgeta.

Long PNG wok bilong karim veksin i go long ol pipel i hat long wanem ol pipel i no laikim veksin.

Planti i bihainim tasol ol arapela na no laik kisim veksin tasol ol i mas bihainim ol protokol we i stap pinis.

Wanpela pater, Pater Eduardo Revilla sbd i givim planti yia long wok misin long Papua Niugini. Em i bin wok long Rabaul, Kumgi long Simbu na nau em i stap long Pot Mosbi. Misin wok bilong en, em long wok wantaim na helpim ol pipel. Em i save givim planti taim long harim ol sumatin, kaunselim ol na bihain harim konpesio bilong ol.

Sampela taim em i save harim konpesio long St Joseph Katolik peris long Boroko. Long Sande moning em i save stap long Srain bilong Mary Helpim bilong ol Kristen long Boroko. Long hia em i save gat planti pipel i kam lukim em na stori wantaim em, harim konpensio bilong ol, kaunselim ol, prea wantaim ol na givim blesing long ol.

Olsem wanpela i stap klostu wantaim ol pipel olgeta taim long prea na selebresen bilong Sakramen bilong Konpesio, em i pilim olsem em yet i mas bihainim ol protokol bilong COVID-19 long banisim ol arapela long COVID-19.

“Werim mask em i impoten. Em i no pil gut long werim mask long longpela taim, tasol mi mas mekim. Mi mas banisim mi yet na mi mas banisim ol arapela tu,” Pater Revilla i tok.

“Mi stap long franlain na mi karim wok bilong givim misin sevis long ol pipel. Ol lain i kam long konpesio i save werim mask taim ol i kam long bung wantaim mi na mi orait long dispela pasin,” em i tok.

Pater Revilla i gat 84 krismas na em i kisim namba wan sut bilong COVID-19 veksin pinis. Nau em i wet long kisim namba tu sut.

“Mi bilip olsem veksin em i gutpela long olgeta pipel,” em i tok.

Pater Revilla i wari olsem planti pipel i no bihainim ol protokol na vaires tu i gro hariap hariap na em samting nogut tru long ol pipel long kantri.

COVID-19 Delta Variant i kamap pastaim long India. Nau em i kalap i go na stap long planti kantri long wol pinis.

Long mun Me, WHO i tok olsem ol i wari tru long dispela Delta Variant. I gat ol arapela variant i wok long subim kalap bilong em, tasol, ol i mas mekim moa wok painimaut long klia gut long pasin bilong em long gro.

Papua Niugini i stap aninit long banis bilong God, tasol long wankain taim olgeta pipel i mas mekim hap wok tu long banisim ol yet na ol famili bilong ol na ol arapela ol i bungim.

Olgeta i mas bihainim ‘nupela pasin’ protokol na helpim long daunim kirap bek bilong varies na no ken kamap long mak olsem India, Indonesia na Fiji.

Yumi mas no ken lus tingting, “Mask yu werim e mi banisim mi, na mask mi werim e mi banisim yu.” Stap seif

Ambrose Pereira sdb i raitim