EKTING Elektoral Komisina Simon Sinai i tokim midia olsem baiometrik voting sistem bai stat long 2022 Nesenel Jeneral Ileksen.

Baiometrik sistem wantaim pesenel Aidentifikesen Kad (ID) em Ilektoral Komisin (EC) bai givim long ol vota long yusim long taim bilong poling.

Sinai i tok dispela baiometrik sistem bai ol i yusim long ileksen em i isipela wei tasol bai manmeri i stat liklik tasol na lukim rot em i wok.

Em i tok klia olsem baiometrik sistem ol bai yusim long ileksen bai stat long foapela siti insait long kantri pastaim na bihain bai EC inap long yusim long 89 distrik.

“Baiometrik em i isi tasol bai stat long sampela we na yumi bai stat liklik long lukim rot yumi ken mekim dispela rot i wok gut,” Sinai i tok.

“Mipela bai stat long Pot Mosbi. Mipela i gat masin bilong mekim wok na mipela traim pinis na mipela i bilip long em i wok na givim ID kad long ol long siti olsem Pot Mosbi, Lae, Mt Hagen, Rabaul na Madang.

“Ol dispela taget eria i bilong mipela long lukim rot mipela i ken wok i go inap long 2023 i go long 2027 long kamapim gutpela menesmen bilong baiometrik sistem long yumi inap yusim long bihain taim.

“Namba wan samting mipela laik lukim olsem ilektoral rol i mas wok gut wantaim ol poto bilong ol vota na long wankain taim masin mipela i gat i ken kisim piksa bilong yu na kamapim poto bilong yu na putim long sistem na tu i ken printim ID kad o nogat.

“Mipela gat 120 masin i redi na mipela laikim sampela moa long 331 LLG na long traim long inapim olgeta populesen long hap.

“Sapos taim i no inap bai yumi go bek tasol mipela traim long abrusim planti samting we i hat na eria mipela laik edresim bihainim ekpiriens bilong pastaim yumi bin bungim,” Sinai i tok.

Sinai i tok Komisin i wok long toktok wantaim ol wod kaunsel na LLG.

Straksa bilong ol bai mipela yusim long awenes, print ol komenrol, salim i go aut na long save samting em i orait em mipela mas lukim gut pastaim.

Joseph Dawai i raitim