WANPELA helping tisa long rurel Madang i lusim laip bilong taim em i painim rot long sevim laip bilong em.

Dispela tisa em Geraldine Maniura Arimbandai, husat i bin gat 27 krismas taim em i dai long Madang Modilon Haus sik long las wik. Ol i planim bodi bilong Geraldine long Madang asde.

Madang Katolik Edukesen Edvaisa, Bruno Tulemanil i tokim Wantok Niuspepa olsem Geraldine wanpela National Development Bank opisa bipo tasol i bin go stap long ples bilong man bilong em long Josephstaal.

Em i tok Katolik sios i statim wanpela nupela hai skul long Josephstaal. Skul i no rejista na sios i wetim yet long kisim tok orait long Edukesen Dipatmen long rejista long dispela skul.

Mista Tulemanil i tok ejensi i no gat save olsem Geraldine wantaim man bilong em i wok long skul.

Em i tok bikos tupela i no rejista tisa, hai skul i bin kisim ol aninit long menesmen bilong em long helpim ol long sampela wok olsem helpim tisa (ancillary staff).

Em i tok wok bilong lukautim ol ancillary tisa i stap long han bilong wan wan skul na i no stap aninit long menesmen bilong Madang Katolik Edukesen opis.

Em i tok em i kisim tok tasol long Tunde taim toksave i kamap long opis bilong em olsem i gat kain hevi i kamap long laip bilong Geraldine.

Tulemanil i tok ejensi wantaim lokal komyuniti i bin givim helpim long haus krai bilong Geraldine.

Em i tok rot bilong kar, ples balus na two-way redio sistem i pas long dispela taim na long ol pipel i kisim sevis long Jospehstaal i bikpela salens.

Em i sori olsem Geraldine i dai bihainim kain ol salens.

Em i askim ol tisa meri olsem aninit long ejensi lo, tisa husat i gat bel i mas kisim malolo 6-pela wik bipo long de em bai karim na 6-pela wik bihain long em i karim.

Em i tok ol tisa husat i gat kain hevi olsem i mas bihainim lo long stap gut.

Geraldine i bin gat bel long 8-pela mun na em na man bilong em i wokabaut moa long 40 kilomita long go long Bogia Helt Senta long kisim helpim long ol dokta.

Tupela i wokabaut bikos Josephstaal Helt Senta i pas na narapela haus sik we i stap klostu em Bogia Helt Senta.

Tasol taim tupela i kamap long Bogia, ol wokmanmeri i lukim hevi bilong Geraldine i bikpela tumas na ol i askim tupela long go long Madang.

Tupela kisim ambulens na go long Madang Modilon Jeneral Haus sik.

Taim tupela i kamap long Madang Modilon Jeneral Haus sik sori tumas Geraldine i stap liklik taim na i lusim laip bilong em.

Wanpela lokal Josephstaal man, Patrick Angrai i no amamas long dai bilong dispela yangpela na strongpela meri na i askim gavman long stretim Josephstaal rot, ples balus na bringim bek ol sevis i go long sab-distrik.

Stori bilong bagarap bilong Josephstaal rot na ol askim i go long gavman long stretim dispela rot i no nupela.

Olgeta yia, manmeri long dispela hap bilong Madang Provins i bungim wankain hevi na mekim wankain askim long wok stretim rot tasol nogat wanpela gutpela bekim i kam long nesenel gavman o ol lokal lida.

Josephstaal rot em nesenel rot bikos rot i bungim tupela distrik, Bogia na Midel Ramu.

Em i no klia taim gavman bai stretim rot na bringim gutpela sindaun ol pipel.

Paul Zuvani i raitim